Tura, Jylliew 17: Uwei u nongniah jong ka Autorickshaw ula duh ïa la ka jingim na ka jingshah tynrah ha kawei ka Bolero Pickup katba ar ngut ki la mynsaw jur ba kynthup ïa kawei ka heprit kaba dang 3 snem ka rta.
Kane ka jingjia ka la jia haka janmiet jong ka sngi Thohdieng hajan ka Tura Nehru Park.
Katkum ka jingïathuh kiba ïohi ïa katei ka jingjia, ki la ïathuh ba ka Bolero Pickup kaba don ïa u nombar ML14-6270 kaba la pynher sted bha kala wan na ka liang kaba bakla (Wrong Side) jong ka surok bad ka la leit tynrah beit ïa katei ka Autorickshaw kaba don ïa u nombar ML08D-6239.
Ka jingtynrah kala long kaba jur bha ha kaba ka Autorickshaw ka la sied na surok sha ka jaka ba don ki jingthung bad ka kali Bolero ruh ka la noh sharud jong ka surok.
La pynkit noh mardor ïa u nongniah jong ka Autorickshaw u Semson M Sangma, 36 snem ka rta ba shong basah ha ka thaiñ Molmegre, Araimile sha Tura Civil Hospital hynrei ula khlad noh namar ka jingjur palat jong ka jingmynsaw na ka jingshah tynrah haka Bolero.
Kawei Jadambe Cheana M Arengh, 28 snem ka rta kaba dei ka kmie jong i khun kynthei ba dang 3 snem ka Emiansha Amadora M Arengh kiba na Danak Dopgre, Araimile kila mynsaw jur ha katei ka jingjia.
