Nongpoh, Nohprah 12: Uwei u samla u la duh noh ïa la ka jingim bad uwei pat u la mynsaw hadien ba la shah syllad ha kawei ka trok kaba la phet krad noh kaba la jia mynta ka sngi ha 12mer, Byrnihat ba hap ha ka surokbah National Highway-6 ha Ri Bhoi District.
Ha kane ka jingjia, uwei u samla ba la ithuh kyrteng kum u Sunil Deka u la ïap hashen bad uwei pat uba la tip kyrteng kum u Bidut Bordoloi u la mynsaw jur, na kane ka jingshah tynrah katei ka trok kaba la phet krad hadien ba la tynrah ïa ktiei ki ar ngut.
Ka tyllong khubor na ki Pulit la ong ba ïa utei u ba la mynsaw la rah noh wut wut sha Byrnihat PHC ban ioh ïa ka jingsumar bad ïa utei u samla ba la khlad noh la rah sha Civil Hospital Nongpoh ban pyndep ïa ka postmortem Examination.
La ïathuh ba kine ki ar ngut kiba la kynduh ïa katei ka jingjia ba sngewsih ki dei na ka shnong Ampher ba hap ha ka Jorobat Police Outpost, Assam.
Na ka liang ki Pulit ki la pynlong ka jingtohkit halor kane ka jingjia bad la dep ruh ba ujor da ka FIR pyrshah ïa katei ka Kali kaba la phet krad na katei ka jingjia.
Ki Pulit ki dang pynlong ka jingtohkit ban ioh kem ïa katei ka tork kaba la syllad ïa kitei ki ar ngut ki samla kiba dei na Assam, ong ka tyllong khubor na ki Pulit.
