Shillong, Nailur 04 : Ka MLA jong ka Shillong East kaba dei ruh ka Myntri ka sorkar jylla, Dr. M Ampareen Lyngdoh ha ka janmiet sngi Palei ka la ïam rangbah naduh shwa ban rung poi ha iingsah hadien ba ka la ïoh pdiang ïa ka khubor ba ka Iing Bishar ka la pynksan ïa ka ha ka mukotduma kynnoh tah sia lieh kaba la ïaid la 17 snem.
Haba kren bad ki lad pathai khubor halor kane, ka Myntri ka la ai ka jingïaroh ïa ka Meghalaya High Court kaba la saitkhuid ïa ka na baroh ki jingshah kynnoh kaba ïadei bad ka mukotduma thungkam nonghikai kaba la neh mynta la 17snem.
Ka Myntri ka la pynpaw ïa ka jingsngewlaitluid bad sngewsting hadien ba ka la ïoh pdiang ïa katei ka khubor. “Nga la mad shibun ki jingshah kynthoh shah kren bein ha kine ki 17 snem ba la lah,” ka la ong.
Shuh shuh ka la ong, “Mynta ka sngi nga kynmaw i Mei jongnga iba la khlad noh. Nga la ong ïa i Mei ba nga khlem leh ïa ka hynrei i la khuslai, bad mynta i khlem lah ban donlang bad ngi ban ïa kmen lang ïa kane ka sngi ba kmen. Nga kynmaw ruh ïa i hynmen jongnga i Bah RG Lyngdoh iba la khlad noh, i ba hapdeng kiei kiba la jia baroh hynrei i ju ong pat ïanga ba lada phi khlem leh ïa ka phin lah ban ïai bteng ban ai ka jingshakri ïa ki paidbah.”
Ha kajuh ka por, ka Kong Ampareen ka la ai khublei ruh ïa ki hynmen para baroh, ïa ki khun bad khamtam ïa u kurim, ki bahaiing ha sem, ki nongkyrshan kiba ïai don syndah bad ka bad khamtam eh ïa ka kynhun ki nongsaid aiñ kynthup ïa u Senior Advocate Salman Khurshid uba la don bad iakhun na ka bynta jong ka haduh ban da ïoh ia ka jingjop.
Ka Myntri ka ong ruh ba ka jingjop ha katei ka sngi ka pyneh biang ïa ka daw. Ka ong ruh ba ka kyrteng jong u Kpa jong ka u Bah Peter Garnette Marbaniang ka ieng ha ka burom. “Ngi dei na ka longiing kaba bat ïa ka hok bad kaban shakri ïa ki paidbah kat ha la ka bor jongngi,” kala bynrap biang.
Ha kajuh ka por ka Myntri ka la pynpaw ruh ïa ka jingïaroh ïa ki bor ka ain da kaba ong, “Kane ka ri kan ïakhun na ka bynta ka hok, bad kane kadei ka hok kaba nga ïoh mynta ka sngi.”
Nangta ka ong ruh ba ka sngewkmen ba ki nongkyrshan jong ka ki ïai neh bad bteng ban pynjop ïa ka wat hapdeng bun ki jingshah kynthoh ki jingshah kren bein ba harukom.
“Ngan duwai na kabynta kito kiba la kynnoh khlem pyrkhat ïanga to U Blei un ai ïanga ka bor ba ngan lah ban mab ïa iwei pa iwei ïa kito kiba la pynpdang ïa ka mynsiem jongnga,” ka la ong.
Shuh shuh ka ong ruh ba ka sngewnguh ïa u Blei bad ïa ka Balang Katholik bad khamtam eh ïa ki Lyngdoh Sohblei kiba la ju duwai na ka bynta ka jingpalei ka bor pyrkhat bad ruh ha ka mynsiem.
Ha kane ka janmiet naduh ki bahaiing ha sem haduh ki nongkyrshan ki la ïalum lang khrui ha iing sah jong ka Kong Ampareen ban ïa lehkmen halor katei ka khubor ba ki ïoh pdiang.
