ïam pangnud ki paidbah ba pynjulor ka ‘er langthari ïa ki iïng bad ki jaka rep ha Malidor EJHD

Khliehriat ïaïong 14: Ka ‘er langthari kaba la wan beh kyrthep kaba iasyriem kum ka tornado, hynnin jan miet ka la wan beh kynsan bad pynjulor iya kiba bun tylli ki iïng ki sem ha shnong Malidor, East Jaiñtia Hills District, bun tylli ki iïng ki la julor ha ka jingshah ban ha ki dieng bad shah rong noh sha jngai bah ïa ki tin sop iïng, kiba bun ki briew ki la shu shong khlem iïng khlem sem bad ki la shu shong rieh shi por ha ki iïng jong ki para marjan.
Kane ka ‘er langthari ka la pynjulor ruh ïa kiba bun ki mar rep jong ki paidbah, kum ki dieng kwai, ki tympew, ki soh bad kiwei kiwei ki mar rep, da ki hajar tylli ki dieng kwai, ki dieng soh ki la khyllem, kane ka jingwan lynshop ki bor ka mariang ka la pyn kthang haduh katta katta ïa ki paidbah nongrep jong ka shnong Malidor.
Ym tang katta, ka jingioh bor ding ha ka thaiñ ruh ka la thut bha namar kiba bun tylli ki post electrict ki la khyllem naduh tynrai bad don ruh kiba la dkut shiteng bad ki sainar electrict ki la shu saphriang lut ha madan.
Haba kren bad ki pathai khubor, ki nongshong shnong jong ka shnong Malidor, ki la pynpaw ka jingsngewsih kthang namar kane ka jingwan lynshop ki bor mariang, ka la wanrah ïa ka jingduh noh ïa ki mar rep kiba long kum ki lad kamai ja kpoh jong ki, namar ki briew ha kane ka thaiñ ki dei kiba im da ka rep ka riang.
Na ka liang ki bor shnong ki la pyntip sha ka ophis C&RD Block Wapung khnang ba kin wan ban jurip bad sakhi ïa kane ka jingjulor kaba shyrkhei kaba la ktah ïa ka kamai kajih jong ki bad kumjuh ruh ka jingduh noh ïa ki iing shong iïng sah.
Ha kajuh ka por, ki paidbah ka Malidor, ki don ka jingkhmih lynti ba ki bor ba dei peit kin shim khia lem halor kane ka jing kordit ba ki la iakynduh bad kumjuh ruh ki khmih lynti ba ka tnat MeECL kan shim khia noh kham kloi ban pynbit pynbiang ïa ka bor ding ha ka thaiñ.