Shillong, Risaw, 19: Ka dkhot jong ka Meghalaya State Commission for Protection of Child Rights (MSCPCR) ka Kong Donakor Hynñiewta ka la ïam pait dohnud katba ka dang ai jingkren ha ka jingïalang sngewlem bad thang mombati ba la pynlong da ka Dorbar Shnong Nongrah, Shillong ha ka sngi Saitjaiñ halor ka jingshah pynïap u heprit Kyrshanbor Kharmudai, 7 snem ka rta bad ïa ka met jong u la lap ha ka step 9 tarik, Risaw, 2025 narud surok khlaw Mawpat hadien ba u la jah rngai najan iing lajong ha Lum Myrboh, Nongrah, Shillong ha ka noh phai sngi jong ka 8 tarik Risaw, 2025.
“Haba nga peit ïa ka durkhmat jong i, nga pang ka mynsiem ban shu duh (noh ka jingim) kumne,” la ong ka Kong Hynñiewta kaba la jaw ummat ha kane ka khyllipmat katba ka dang phai sha dur jong u heprit Kyrshanbor.
“Kumno kum ine i khynnah in shu shah dkhat noh ka jingim,” la ong shuh shuh ka Kong Hynñiewta.
“Ngam shym la mut ban wan hynrei i Secretary i phah wan ïa nga ban ai jingkyrshan bad nga khlem mutdur ruh hi ruh ba in phah ïa nga ban ai jingkren. Nga wan hangne ban kyrshan bad ban sngewlem ïa ki bahaiing hasem jong i (heprit Kyrshanbor),” la bteng Kong Hynñiewta ban kren ryngkat ki ummat kiba tuid arliang ki ngab.
Ka la ong ba kum ka longkmie ka sngewpangnud ban ïohi ïa kum kane kane ka jingjia. “Naduh ba la mih ka khubor halor kane ka jingjia nga khlem peit, nga shu ïohsngew, nga syier ka mynsiem bad nga pang ka dohnud, ka pait ka dohnud jong nga, ba i khynnah ba dang katne snem (ka rta) in shu duh ei (ïa la ka jong ka jingim),” ka la bynrap.
“Kum ka Commission nga kyrpad ïa phi baroh lehse lada don kiwei pat ki jingjia ïa kiwei ki khynnah rit ba phin mih shakhmat. Lehse ki ong ba ki Pulit kim leh eiei, hynrei ki Pulit leh bha ïa la ka jong ka kamram bad lada phi ïohi ïa ka jingeh jong ki khyllung khynnah phi lah ban wan sha ka Commission,” la kyntu ka Kong Hynñiewta.
Ka la kyntu ïa ki paidbah ba ki lah ban ai jingtip sha ka Commission lada don kino kino ki jingjia pyrshah ïa ki khynnah rit khnang ba ka Commission kan dup lah ban ai jingkyrshan katba lah. “Wat ju duh jingkyrmen, to don ryngkat lang bad ngi, ngin ïatreilang bad phi,” la ai mynsiem ka Kong Hynñiewta.
Ka la ong ruh ba ki bahaing hasem ki lah ban leit ud leit nam ha ka dorbar shnong ïa ki jingeh jong ki khynnah rit bad lada kim sngew suk mynsiem ki lah ban leit ud sha ka Commission bad sha ka Child Welfare Committee kaba kloi ban ai jingïarap na ka bynta ban ïasyllok ïa ki jingeh jong ki khynnah.
Ka la kyntu ïa ki bahaiing hasem bad ïa ki paidbah ba kin ai ka jingshaniah ha ki Pulit kiba la leh la ka jong ka kamram khnang ban pynïoh ïa ka hok jong u heprit Kyrshanbor.
