Khliehriat Rymphang 06: U Myntri ka sorkar jylla u Bah Lahkmen Rymbui uba la wan poi sha ka jaka ba jia ka jingbthei bom dynamite ha Mynsngat East Jaiñtia Hills District bad haba kren sha ki pathai khubor u la ong ba ki pulit ki la kem noh ar ngut ki briew kiba la suba donkti ha katei ka jingjia ha par dewïong bad ka jingtohkit ka dang ïaid shakhmat.
U Bah Rymbui u la ong ruh ba na ka liang ki bor district jong ka East Jaiñtia Hills District mynta ki la pynsangeh lut ïa baroh ki jingtrei ha ki par dewïong kiba shu pyntrei beaiñ khnang ba kum kine ki jingjia ba sngewsih kin nym jia shuh. U la ïathuh ruh ba naduh hynnin ka sngi tang shu ïoh jingtip u ADC ka East Jaiñtia Hills District, u Bah C. P. Mawkon, ki heh pulit lem bad ka kynhun pulit, ki shipai pyllait im ba kynthup ki National Disaster Response Force, ka State Disaster Response Force, Special rescue team ki la don ha kane ka jaka bad ki dang ïaibteng ban wad ïa kiba dang sahkut shapoh krem dewïong.
Haba kren bad uwei u briew uba don ha katei ka jaka ha Mynsngat uba dang ïarap lang ïa ki shipai ha ka kam ban wad ïa kiba dang sahkut u la ong ba ki dang don sa kumba arphew ngut ki briew kiba dang sahkut shapoh ki krem dewïong kiba ym pat lah ban sei, u la ong ruh ba ki don san haduh hynriew tylli ki thliew dewïong ha katei ka jaka ba jia ka jingbthei dynamite bad ki lai tylli ki thliew dewïong ki dei kiba la shah ktah bha, kumjuh ruh katkum u kyrwoh khubor ba la phah da u Superintendent of Police ka East Jaiñtia Hills District, u Vikash Kumar, IPS hynnin ka sngi la ong ba ha kaba ïadei bad ka jingbthei ki bom dynamite hapoh krem dewïong kaba don ha Mynsngat ha ka thaiñ Thangsko kaba hap hapoh Umpleng Police Outpost la antad ba ki dang bun bha ki briew kiba dang sahkut hapoh krem dewïong.
Ha katei ka jaka ba don ki par dewïong ha Mynsngat la lap ruh ïa ki briew kiba dang ïam kthang kiba dang ap lano yn sei ïa ki bahaïing hasem jong ki shabar kiba dang sahkut shapoh krem dewïong.
Shuh shuh la lap ruh ïa kawei ka longkmie kaba kyrteng ka Tara Devi Malakar kaba dangïam kthang bad kdup ïa ka khun ksiew kaba dang rit kaba dang ap khmih lynti ban ïakynduh noh bad la u jong u khun uba dei uba ju tih dewïong ha katei ka jaka ha Thangsko, watla ka la tip ba u khun jong ka u dang im bad u la phet krad na katei ka jaka bad mynta kane ka longkmie ka dang ap khmih lynti bad ïam kthang pat namar ba kam pat shym la ïakynduh ïa u khun.
