Shillong, Jymmang, 03: Ki samla pulje jong ka Department of Mass Media ka St. Anthony’s College, Shillong ha ka sngi Baar ki la rai ban ym pyndonkam shuh ïa ki bilor um plastik.
“Kane ka katkum ka jingbynta ka jingpynkhreh ïa ka jingthoh ha ka kyrdan pule 6th Semester kaba la ai kyrteng “SAC against SUP Bottles” kaba la sdang naduh ka 25 tarik u bnai Ïaiong, haduh ka 4 tarik mynta u bnai ha St. Anthony’s College,” la pyntip ka Head of Deparment ka Dr. Cherry K. Kharshiing.
“Ka thong “SAC Against SUP Bottles” ka dei ka jingthmu ban kiar na kaba pyndonkam ïa ki bilor um plastic hapdeng ki samla pule jong ka St. Anthony’s College. Ka mat kaba kongsan eh ka long ban pynshai bad ban pynsngewthuh da kaba kiar kaba pyndonkam ïa ki bilor um plastik bad ban pynshlur ïa ki samla pule ba kin rah sha ki jaka pule manla ka sngi da ki bilor um bad ban pyndonam da ka umdih ba la pynkhreh hi ha phyllaw jong ka College,” ong u kyrwoh.
Ha ka sngi pynkut, yn sa ïadonlang u Provincial jong ka Shillong Province u Rev. Fr. Paul Olphindro Lyngkot kum u kongsan.
Ban pynkut ïa kane ka jingïalap paidbah ki samla pule kin sa pynlong ïa ka jingïathir nia halor ka phang kaba la ai kyrteng, “Waste to Grace” da u Bankitlang Nongbri, uba long u nongseng ïa ka Eco- Ri bad ïa ka jingtai halor ka phang “Single Use Plastic Water Bottles- An Absolute Monstrosity” ka ban sa long ha Conference Hall jong ka College.
Ïa kane ka jingïatai yn sa pynïaid da u Dr. H.H Mohrmen, u Jiwat Vaswani, u Mr. Carmo Noronha bad ka Dr. Reema V Diengdoh.
Nalor ki jingïathir nia bad ki jingïatai, yn sa pyni ruh ïa ka jingshad paidbah, ki jinglehkai skit, ka jingïasoi bad ka jingpyni paidbah ïa ki dur hapoh ka phyllaw jong ka College..
“Ka mat “SAC Against SUP Bottles” ka dei ka seinjam banyngkong ban pynshai paidbah da ki samla kiba pule ïa ka Mass Media ha ka Department of Mass Media jong ka St. Anthony’s College, Shillong,” ong shuh shuh u kyrwoh.
