Shillong, Lber 29 : U Myntri Rangbah ka jylla u Conrad K Sangma u la ïalam ïa ka Kynhun Myntri mynta ka sngi ban ïakynduh bad u Myntri Kam Pohïing ka ri u Amit Shah lashai ka 29 tarik ha nongbah Delhi ban ïakren pynbeit pud hapdeng ka Meghalaya bad Assam. Namar na ka liang jong u Shah u la khot ïa baroh ar ki Myntri Rangbah kata ïa u Conrad bad u Himanta Biswa Sarma lashai ka sngi sha nongbah Delhi ban ïakren khatduh bad ki shwa ban pynskhem ia ka jingïapynbeit pud ki ar jylla.
Namar kine ki arngut ki myntri rangbah ki la dep ïa kynduh ïa u Amit Shah naduh u Kyllalyngkot mynta u snem bad ai ïa ka kaiphod sha u halor kane ka kam ïa pynbeit pud bad dei hadien ba ula ïoh ban pule bniah ïa ka kaiphod ba u sa khot biang ïa ki sha nongbah Delhi.
Ki Myntri kiba leit synran ïa u Myntri Rangbah ki kynthup naduh u Symbud Myntri Rangbah bah Prestone Tynsong, Myntri kam pohïing ma Lahkmen Rymbui, Myntri ka tnad Industries bad Urban Affairs u ma Sniawbhalang Dhar, u Myntri ka tnad kam khlaw bad I & PR u James P.K Sangma, Myntri ka tnad Sport bad Agriculture bah Banteidor Lyngdoh bad kiwei kiwei.
Na ka liang u Myntri Rangbah ka Assam u Himanta Biswa Sarma ruh la ioh jingtip ba un ïalam hi ïa ki katto katne ngut ki Myntri jongu namar lashai ka sngi ka dei ka sngi kaba kin ïasoi ïa ka soskular jingïasngewthuh jingmut lang bad ka sorkar pdeng halor kane ka jingpynbeit ïa u pud u sam hapdeng ki ar jylla.
Kane ka kam pynbeit pud ka dei kaba la sahteng la san phew snem mynta bad dei tang ha kine ki ar tylli ki sorkar kiba la poi sha ka jingiasngewthuh jingmut ban pynbeit pud shwa ha ki hynriew tylli ki jaka napdeng ki 12 tylli kiba don hapdeng ka jingïakajia. Kine ki hynriew tylli ki jaka ki kynthup ïa ka Taradubi, Gizang, Hakim, Boklapara, Khanapara-Pilingkata bad Ratacherra. Ka jingheh jongka jaka baroh ka long 36.79 Sq Km bad na katei ka Assam ka la mynjur ban pynneh 18.28 sq km bad ka Meghalaya bad 18.51 bad ka Assam.
Lah ban pynkynmaw ba u Symbud Myntri Rangbah ka jylla u bah Prestone Tynsong u la ong dang ha kine ki khyndiat sngi ba ha ka jingïapynbeit ïa u pud u sam donkam ban don ka jingsngewthuh jingmut bad jingïapynbeit lang ban ïa hun baroh arliang mamla. Kumta khlem pep kin don ki jaka ban leit sha ka Assam bad kin don pat ki ban wan ruh sha ka Meghalaya.
U la ong ruh “ Nga sheptieng ba ki don ki kynhun jongki briew kiba ym kwah ba kane ka kam ïa pynbeit pud kan poi sha ka thong ne kan long kaba seisoh” ong u bah Prestone haba ïakren bad ki nongthoh khubor khamtam halor ka Memorandum of Understanding (MoU) ba la ïasoi ka Meghalaya bad Assam ban pynbeit shwa ïa u pud ha ki 6 tylli ki jaka ne ki 12 tylli kiba don hapdeng ka jingïakajia pud.
“ Ka jingshisha ka long haba ïa pynbeit ka dei ban don ka lynti hapdeng la ka long kaba ïoh jingmyntoi ne kaba duh jingmyntoi ruh namar ïa kane ka jingshisha ym lah ban lait don ki jaka ban duh don ki jaka ban ïoh kan ym lah long ba kan duh lut beit ka Assam ne ha kajuh ka por kan duh lut ka Meghalaya. Don ki ban wan sha ka jylla don ki ban leit sha ka Assam ruh kata ka dei ka jingshisha hap ban ïa pynbeit lang da kaba ïasngewthuh jingmut” ong u bah Tynsong.
“ Ngi ïeng skhem halor kane ka nongrim namar lada ym lah ban pynbeit mynta ka bha ban ym ïa pynbeit shuh hi ruh bad ka jingtim kan long ïa ngi ki nongïalam ba mynta ha ki lawei ne pateng ban wan. Lada ym lah ban pynbeit mynta khlem pep kan bteng biang sa 50 snem ka jingïa kajia. Kumta khnang ban ïaid beit hap ban pdiang ïaki jingshisha. Lah biang te lah biang, to ngin ïeng tylli lang bad ïapynbeit lang ïa kane ka kam ba sahteng khnang ba ki pateng ban wan 50 snem ne 100 snem kin ïoh ban ïashong suk shongsaiñ bad lait na kino kino ki jingkulmar” ong biang u Symbud Myntri Rangbah.
