Shillong, Jymmang, 13: Lai phew hynriew ngut ki samla pule jong ka St. Edmund’s College ki la hiar sha ka shnong Khweng, Ri Bhoi district ryngkat lang bad ki nongïalam jong ka NESFAS ban leit jngoh ïa ki jaka rep kiba don ha kane ka shnong.
Kine ki samla ki dei kiba dang pule ïa ka Second Semester jong ka Bachelor of Social Work. Ka thong kaba hakhmat eh kaba kine ki samla ki la leit jngoh ïa kane ka shnong da ka jingtreilang bad ki kynhun trei mon sngewbha ka long kum shi bynta ka jingpule ka jong ki khnang ban dup sngewthuh kham bha haba ïohi da la ki khmat ïa ki kam ba la trei da ki kynhun bapher bapher.
Ha kane ka jingleit jngoh, ki samla pule ki la ïoh jinghikai ha kaba ïadei bad ka rukom rep tynrai, ki jingtip u mynbarim bad ban sngap ruh ïa ki khana kiba ai mynsiem ïa ki nongrep.
Ka Shnong Khweng ka dei kaba don bun jait ki jingrep tynrai katkum ka jinglum jingtip bad ka jingbuh jingkheiñ ba la pynlong da ka NESFAS.
U Adviser and Innovation jong ka NESFAS u Bah Khrawborlang Wahlang u la ïathuh ba ka jingrep tynrai ha kane ka shnong ka la pynmyntoi haduh katta katta ïa ki nongrep bad pynlong ruh ïa ka khyndew kaba lait na ka jingshah pynjaboh ha ka sboh dawai.
U la ong ba ka NESFAS ka dei ka kynhun kaba ju trei ban ai jingkyrshan ïa ki riewkynthei kiba long ki nongïada ïa ka mei mariang.
Ha kane ka sngi, ki samla pule ki la leit jngoh ïa ki jaka rep kiba don ha ki sawdong sawkun jong kane ka shnong.
