Ïalam hi ki MS ïa ki nongïalam ka HANM ban pyntikna ïa kiba dei hok ban ïoh jingïarap

Shillong, Nohprah 18 : Ka Hynñiewtrep Achik National Movement (HANM) myta ka kynti kala leh da ki kam isynei, da kaba leit ai jingiarap ia ki longkmie ba kha khunlung, kiba thiah pang ha Ganesh Das Hospital bad kumjuh ruh ha Civil Hospital Shillong.
Kane ka jingleit ai jingïarap ka seng ka long ruh shi bynta ka jingai khublei Khristmas bad snem thymmai basuk bad kumjuh ruh ban ai mynsiem ba kin ïoh noh hapdeng ki met ba koit ba khiah krat. Ka seng ka la leit ban leh isynei ïa kito kiba donkam shisha ïa ki jingïarap da kaba sam da ki blanket, ka pisa bad da ki jingbam.
Ha shuwa, la pynlong ki jingïalang ba lyngkot ha phyllaw ka Ganesh Das Hospital bad kumjuh ruh hapoh Civil Hospital ha kaba la ïadonlang ruh ki Doktor, ki nurse bad ki nongtrei jong kitei ki ar tylli ki Hospital kiba la pdiang sngewbha bad ai khublei ïa kane ka sienjam ba la leh da ka seng HANM.
Shuwa ban sdang sam ia ki dkhot jong ka HANM la ialam hi da ki Medical Superintendent jong kine ki ar tylli ki jaka ai jingsumar ban kylli pyrthew ia kine kiba thiah pang bad kiba wan kha khyllung ban tip ia kiba dei hok ban iohbad ia kito kiba don lok uba dei u nongtrei sorkar ka seng kam ai hynrei ka ai beit tang ia kito kiba duna shisha ha ka ioh ka kot.
U President jong ka seng HANM u Bah Lamphrang Kharbani u la ong kaba la pynlong ïa ka seng ban jied ïa kine ki ar tylli ki hospital ka long namar ba kidei ki jaka pdeng ha kaba ki ïoh ban sam jingïarap sha ki nongpang kiba wan na kiwei kiwei ki District.
U la ai khublei ruh ïa ki doktor ki nurse kiba sumar ïa kiba pang ba shitom bad phah ruh ka jingai khublei Khristmas basuk bad snem thymmai basuk bakmen ïa ki baroh ba U Blei Un ai ha ki ka met ba koit ba khiah krat.
Shuh shuh u Bah Lamphrang u la ong ba balei ka seng HANM ka jied ia kine ki ar tylli ki jaka ai jingsumar ba heh kiba don hapoh ka nongbah Shillong ka long ba baroh ki nong shong ki District bapher bapher kiba shah sumar ha kine ki hospital kin ioh bynta lang ia ka jingiarap na ka seng bad lada ki leit tang ha kawei ka district ka mut ba ki ba ioh jingiarap kan dei beit tang na kato ka district.