Ïakynduh ki Committee ki ar jylla ban syllok halor ka bha ka miat ki SC, ST bad OBC

Shillong, Jymmang 31: Ka Committee on Welfare of Scheduled Tribes, Scheduled Castes, and Other Backward Classes jong ka Meghalaya Legislative Assembly, hapoh ka jinglong chairman u Bah Lahkmen Rymbui, MLA (Amlarem), ka la pynlong ïa ka jingïalang bad ka committee na Karnataka Legislative Assembly ha ka sngi Thohdieng. Ïa kane ka jingïalang la pynlong ha Annexe Hall, Rilbong, Shillong.
La pynïaid ïa ka jingïalang da u Bah Lahkmen Rymbui, ha kaba la shim bynta da ki dkhot jong ka Meghalaya Committee, ba kynthup ïa u Rupa M. Marak (MLA, Dadenggre), Co-opted Member u Shibu Das bad u Sagar Ch. Das. Kiba la donlang ki long ruh ki ophisar ka Meghalaya Legislative Assembly Secretariat ba kynthup ïa u Bah Raja Kharpuri, Deputy Secretary; ka kong L. Mynsong, Committee Officer; bad ka kong Nicely Kharbuli.
Ki nongmihkhmat kiba la wan na jylla Karnataka la ïalam da u A.R. Krishnamurthy (MLA, Kollegal), Member and Chairman ka Committee, bad kynthup ruh ïa u G.H. Srinivasa (MLA, Tarikere), u H.V. Venkatesh (MLA, Pavagada), u Gururaj Shetty Gantihole (MLA, Baindur), u Siddu Patil (MLA, Humnabad), u Katti Nikhil Umesh (MLA, Hukkeri), bad ki dkhot ka Legislative Council, u Dr. Dhananjaya Sarji S.R. bad ka Balkis Banu.
Na ka Karnataka Legislative Assembly Secretariat la mihkhmat da u Shivaramachari, Deputy Secretary; ka G. Mamatha, Under Secretary; bad u S. Rajashekar, Section Officer.
Kane ka jingïalang ka long kum ka rynsan ban ïasam ïa ki jingtip, ki rukom treikam bad ki rukom leh kiba bha tam kiba ïadei bad ka bha ka miat ki Scheduled Tribes, Scheduled Castes, bad ki Other Backward Classes.
Ïa ki jingïasyllok la pynleit jingmut na ka bynta ban pynkhlaiñ ïa ki jingpyrshang bad ki jingdonkam ka jingïatreilang bad ban ai jingtip na baroh arliang ban pynbha ïa ka roi ka san ha baroh artylli ki jylla.
Halor kane ka jingïalang u Rupa M. Marak (MLA, Dadenggre) u la kynthoh: “Mynta ka sngi ngi la don ka jingïalang kaba seisoh bad ïoh ki jingtip bad ka committee na Karnataka. Ki la wan shaduh sha Meghalaya, bad ngi la ïoh ka lad ban ïasyllok ha kiba bun ki kam ka bha ka miat ba la pyntreikam da ki sorkar ka Karnataka bad Meghalaya. Ngi la sam ïa ki jingai jingmut, ïa ki experience, bad ban pynïar ïa ki policy kiba kyrshan ïa ka bha ka miat ki SC, ST, bad OBC ha baroh artylli ki jylla. Kane ka jingïasam ïa ki jingmut kan ïarap ïa ngi ban pynwandur ïa ki kam thaw aiñ yn tang ïa kine ki jylla hynrei na ka bynta ka ri baroh kawei.”
Ka Committee ka la pynskhem biang ïa ka jingangnud ban pynkhaiñ shuh shuh ïa ki jingïatreilang hapdeng kine ki jylla na ka bynta ban kyntiew ïa ki kynhun kiba donkam ki lad jingïarap.