ïakynduh ki 2 Myntri Rangbah ha Guwahati ïakren ban pynkhlaiñ ïa ka jingïadei ki ar jylla

Shillong, Nailar 17 : U Myntri Rangbah ka Jylla Meghalaya u Conrad K Sangma ula ïakynduh ïa u Myntri Rangbah ka Assam u Himanta Biswa Sarma ha ka Sngi Saitjaiñ ha nongbah Guwahati bad ka jingïakren jongki ka long halor ka nongrim ban pynkhlaiñ shuh ïa ka jingïadei jongki ar jylla ban lait na kino kino ki jingïapher jingmut khamtam ha ki thaiñ khappud katba ym pat dep ban ïapynbeit ïa u pud u sam hapdeng kine ki ar jylla.
“Nga sngewtynnad ban ïakynduh bad u Myntri Rangbah ka Assam, u Dr Himanta Biswa Sarma ha Guwahati ban ïakren halor ka jingnang pynskhem ïa ka jingïadei hapdeng ki ar jylla bad ïathaw ïa ki lad ki lynti ban nang pynkhlaiñ ïa ka jingïatreilang” ong u Conrad ha X.
Kumjuh ruh u Myntri Rangbah ka Assam Himanta Biswa Sarma ruh ula pyntip ïa ka jingsngewhun jong u halor kane ka jingïalang bad ong “Mynta ka sngi, ha Guwahati, Nga la ïoh ïakren bad u Myntri Rangbah ka Meghalaya u Shri @Sangma Conrad Ji. Ngi ïakren ïa bun bah ki mat ban pynkhlaiñ ïa ka jingïakiew lang kumjuh hapdeng ki ar Jylla” thoh u Himanta ha X khlem da batai bniah ïa kiei kiei ruh.
Ki arngut ki Myntri Rangbah kila ïakynduh khatduh eh ha ka 2 tarik Jylliew bad ïarai ban pynïeng noh ïa ki mawpud ha ki san tylli ki jaka na ki hynriew tylli ki jaka bala ïadep pynbeit ïaki jingïakajia.
U Myntri Rangbah ka Meghalaya ula ong ha ka jingkren ha ka jingrakhe Independence Day ba ka kam ka la ïaid shakhmat ha kaban pynbeit noh ïa ka jingïakajia pud kaba sahteng la bun phew snem bad ka Assam kynthup ka jingpyndep ban pyn ïeng ïa ki mawpud ha ka thaiñ Hahim kat kum ka MoU bala ïasoi.
Kine ki ar Jylla kila ïasoi ïa ka soskular ha u Lber 2022 ban pynkut noh ïa ka jingïakajia ha ki hynriew tylli ki jaka napdeng ki khat-ar tylli kiba don ha u pud ba jrong kumba 884.9 km.
Ka Meghalaya kaba la pynkha na Assam ha u snem 1972, kala tynjuh pyrshah ïa ka Assam Reorganisation Act u snem 1971, kaba wanrah ïa ka jingïakajia pud ha ki 12 tylli ki jaka. Ban weng noh ïa kane ka jingeh, kine ki Jylla kila thaw ïa ki Regonal Committee ha u snem 2021, bad da ka jingai jingmut jong ki, la lam sha ka jingïasoi ïa ka Memorandum of Understanding ha ka 29 tarik Lber, 2022.
Hapoh kane ka soskular, haduh 36.79 km na ki jaka ba ïakajia la ïaphiah mar katjuh hapdeng ki ar jylla ha kaba ka Assam kala ïoh 18.51 sq km bad ka Meghalaya kala ïoh 18.28 sq km.