Shillong, Jymmang :Ka Sengkhasi Sohiong pyllun ka la leit ban ïakynduh kyrpang ïa u MP ka Rajya Sabha u Prof.Rakesh Sinha ha kane ka sngi U Blei ba la lah ban pan jingïarap halor ki jingdonkam jong ka seng lyngba ka bhah na ka sorkar India.
Ha katei ka jingleit ïakynduh la lamkhmat da u General Secretary ka Seng u Bah Kampar Shabong ha ryngkat ka jingsynran lang da ki dkhot nongkitkam.Ha kane ka jingïakynduh na ka liang ka Sengkhasi ka ba dei ka Sengniam jong ka jaidbynriew hynñiewtrep hynñiewskum bad ka ba khmih ruh na ka bynta ban pynneh pynsah ïa ki riti dustur, ka longniam longrukom bad ïa ki matti u longshuwa manshuwa ka la pynpaw halor ki ba bun ki jingeh ki ba kum ka Sengkhasi Sohiong hi baroh kawei ka ïakynduh.
Na ka liang u secretary u la pynsngew ruh ba haduh mynta ka Sengkhasi Sohiong pyllun kam don wat tang ka ïingseng ban lum ban lang ïa ki khasi ki ba bat ba ksoh ïala ka jong ka niam. Ka Sengkhasi Sohiong pyllun ka dei ka ba peit ba khmih ïa palat 36 tylli ki tnad seng kiba dei naduh Nongspung sha Diengiei bad na Mairang shaduh Rangshken.
Ka Sengkhasi Sohiong pyllun ka la pynpaw ruh ba ha ka jingïaphylliew jingmut ka ba la bun bunsien halor kane ka jingeh ka la wad ki lad ki lynti kumno ban ïoh noh la ka jong ka ïingseng. Kumta da ka wei ka jingmut ki la shim ïa ka rai ban leit ïakynduh ïa u MP u Rakesh Sinha, kata hadien ba ki la ïohi ba une u MP u dei u ba kloi ban noh jingïarap sha ki sengniam lane sha ki shnong ki thaw ki ba don ka jingeh ha ka ba ïadei bad ki lad jingïarap pisa.
Kumta ruh na ka liang kane ka kynhun ka la buh ka jingkyrpad ïa une u MP ba un pynurlong ïa ka jingangnud jong ka seng khnang ba baroh ki jingthmu kin long ki ba ïaid beit ïaid ryntih.Shuh shuh ha kane ka jingïakynduh na ka liang une u MP ruh u la kular ba un leh shitom ban pynurlong ïa kane ka jingdawa ka jong ki.