ïakynduh ka MPESA ïa u Commissioner & Secretary ka tnad Pule halor ka subjek Physical Education

Shillong, Lber 08 : Ka subjek Physical Education hadien ba ka Ri India ka la pyntreikam ïa ka National Education Policy, ka dei ka subject kaba donkam ban pynrung hapoh ki skul bad halor ka jingïohi ba kane ka subject kam rung ha ki skul bad ki college, ka la pynlong ïa ka Meghalaya Physical Education & Sports Association (MPESA) ban leit ban wad jingtip na ka Sorkar Jylla.
Kane ka Association ha ka jingïalam ka Vice President ka Dr. Ïadarika Wann, u General Secretary, bah Sunny B. Warjri bad ha ka jingsynran u Adviser, u bah Kyrmenlang Uriah ki la ïa leit ban ïakynduh ïa u Commissioner and Secretary ka tnat Education, u Vijay Kumar Mantri hapoh ka ophis treikam jong u kaba don ha Additional Secretariat.
Ha kane ka jingïoh ban ïakynduh ïa u Commissioner and Secretary, kane ka association ka la kyndit bad dap da ka jinglyngngoh namar ba ka tnat Education ka khlem shim ïa kane ka subjek kum kawei na ki subjek kiba donkam ban ai jinghikai sha ki khynnah bad ki samla pule.
Haba kren sha ki lad pathai khubor, u bah Sunny u la pynpaw ba ka jingïakynduh bad u Commissioner & Secretary ka long kaba sngewtynnat namar ba ki la ïoh ban pynsngew ïa shibun ki jingeh kaba ki mad ïa kaba na ka liang u Commissioner ruh u la kular ba un shimkhia.
Ha kawei pat ka liang, u la pynpaw ka jingsngewdiaw namar ba na ka por sha ka por ki ju phah ïa ki shithi sha ki ophisar ka tnad Education hynrei kaba sngewsih pat ka long ba kine ki shithi kim poi satia sha u Commissioner & Secretary bad um don jingtip shaei ki poi ruh.
Ki la ong, ba ha ka jingïakynduh bad u Commissioner bad Secretary ki la pyntip ruh ïa u halor ka jingbym biang ka rukom thungam ha kaba ïadei bad kane ka kam namar dang ha u snem ba ladep, haba ka lait ka kam ha DIET, kiba thungkam wat haba ki tip ba ki don ki samla kiba la pyndep ïa ka jingpule Physical Education hynrei haba ka ih ka resol, kiba shah thungkam kim dei kiba don ïa ka jingtip bad kane ka jingpule hynrei da kiwei pat ki kyrdan pule.
Shuh shuh, ki la ong ba ha ka jingïakynduh ki la ïoh ruh ban kdew halor ka jingdon ki skul ki bym kwah ban don ïa kane ka subjek ha ki skul kaba na ka liang u Commissioner and Secretary u la kular, ba shen yn sa pynmih ïa ka hukum ba ki skul baroh hapoh ka Jylla ki dei ban don noh ïa katei ka subjek bad ban thung noh da ki nonghikai kiba la pyndep ïa kane ka jingpule naduh ka Diploma haduh ka Doctorate bad ka NET.