ïakynduh ka HYC Mawlai Circle ïa u EE- PWD halor ka jingsahteng ka surok St Teresa Road

By Mawphor Editor On Jul 8, 2022

Shillong, Naitung : Ka Seng Hynñiewtrep Youths’ Council (HYC), Mawlai Circle ha ka 6 tarik mynta u bnai hapoh ka jingïalam u President, u Bah Donboklang Kharlyngdoh ka la leit ban ïakynduh ïa u Executive Engineer (EE) PWD Road Bah C.Kharmudai ban ïakren halor ka jingsahteng ka jingtrei ïa ka surok St Teresa Road ka ba jngai kumba 3 kilomitar ei ei na Lai lad Mawlai Umshing Mawkynroh shaduh sha Mawlai Mawroh.
Haba ïakren ïa ka jingsuki bad sahteng kane ka kam ka ba ka tnad PWD lyngba ka CRF scheme ba la mang naduh u snem 2019-20 kumba 12 klur shiteng, na ka liang ka seng ka la ong ba kam lah khlem da kynthoh ïa ki kontraktor ki ba suki ban pyntrei ïa katei ka surok.
Ka Seng ka la ong ruh ba ki kontraktor ki ba trei ïa kane ka kam ki long i Kong Banalari bad u Bah Rocky Dhar. La pyntrei ïa ka kam ba 600 mitar da i Kong Banalari bad ïa ka 2.400 km la pyntrei da u Bah Dhar.Ka seng haba ka la leit jngoh da lade ka la lap ba 95% i Kong Banalari i la dep pyntrei bad I Bah Dhar pat i dang trei kumba 40% .Kumta ka seng ka la ong ba kane hi ka paw shai, ba dei ka jingkheiñ sting jong u kontraktor.
Ha katei ka jingkynduh jong ka seng ïa u EE ka la kyntu ïa u ba un hukum ïa kitei ki kontraktor ba kin pynsted noh ïa kane ka jingtrei namar lada katei ka surok ka bha ka jingdheng kali ha ka surok long round road Mawlai kan pynduna shibun.
Shuh shuh ka seng ha kane ka sngi ka la ïakren ruh halor ka jingsniew rathai jong ka surok Long Round Road (Mawlai Petrol pump sha Mawlai FCI ) kaba la ktah ïa kiba bun ki nongleit nongwan.
Na ka liang u EE u la ïathuh ba ïa mynta ka tnad PWD ka ap satang ïa ka PHE ba kan pyndep noh kloi ïa ka jingbujli pipe thymmai ha shi lynter katei ka surok lyngba ka Amrut sheme bad ka Phase III jong ka GSWSS.
U la ong ruh ba lada ka PHE ka la dep ïa katei ka kam ka PWD kam don jingeh ban siang noh ïa ka surok thymmai da ka BMBC ba la mang 3 klur tyngka.
Kumta na ka liang jong ka HYC Mawlai circle ka kyntu ïa ka ophis u CE jong ka PHE bad ïa ka GSWSS ba kin pynsted noh ïa katei ka jingmaramot ïa kitei ki pipeline, khnang ba lah ban ïohi noh ïa ka surok ka ba bha bad ba itynnad hapoh ka shnong Mawlai.Kane ka long katkum u kyrwoh lyngba u Bah Ophy Suting, Publicity secretary.