Nongkasen, ‘Naitung, 19: Ka Federation of Khasi Jaiñtia & Garo People (FKJGP) jong ka Nongkasen Unit hapoh ka jingialam u President, samla Firstborn John Marngar ryngkat ki para dkhot mynta ka sngi ka 19 tarik u ‘Naitung, 2022 ki la leit ban ïakynduh ïa u Sub Divisional Officer jong ka PWD (R) halor ka jingsniew jong ka surok Nongkseh sha Mawkhohngui.
Ha ka kyrwoh khubor ba la phah da u President ka FKJGP, u samla Firstborn John Marngar u la ong ba kane ka jingleit ïa kynduh ïa u SDO ka long hadien ba ka seng ka la sakhi da la ki jong ki khmat bad ka jingud jingnam na ka liang ki paidbah nongshong shnong bad ki marjan shnong ki la leit ban ïa kynduh ïa u bad ruh namar ba kane ka surok ka la wanrah ka jingeh shibun khamtam ïa ki kali kamai bad ki kali kit mar kum ïa u biskot namar kane ka aïom mynta ka dei ka aïom biskot bad ki paidbah ki ïa kamai ja kpoh na une u mar rep. Ym tang kata, ka seng ka la pynsngew ruh ba ka wanrah jingeh ruh ïa ki khynnah skul bad khamtam ïa kiba pang ba shitom bad don ruh ki kali heh kiba la sahkut teng ha kane ka surok tang namr ka jingtlor noh bad julor noh kane ka Surok.
U la pynpaw ruh ba hadien ba ka seng ka la dep ïa kynduh ïa u Sub Divisional Officer ka la ïoh ïa ka jubab na u bad na ka liang jong u um dei ba u khlem leh ei ei ne sngap mynthi hynrei u la dep ban phah ïa ka jingthoh ne proposal napoh ophis halor kane ka surok bad haduh mynta u dang ap ïa ka jingmynjur ne approval na ka sorkar la kan mang pisa ne em ïa kane ka surok namar ma u ruh u sngewthuh ïa kata ka jingeh ba ki paidbah ki la ïa kynduh.
Namarkata, na ka liang jong ka seng ka ai khublei ia u bah D. Lamare ba dei u Sub Divisional Officer jong ka office PWD (R) halor ka jingtrei shitom ka jong u bad kyrmen ba kane ka surok kan sa ïoh ïa kata ka mang pisa khnang ba yn ïoh ban sdang noh ban pyntrei ïa kane ka surok kaba la sniew shaba palat.
