Nongstoiñ, Ïaiong 16: Ka jingleh bym suid ñiew bad ka jingbym kheiñ snep jong ki nongtrei jong ka Meghalaya Energy Corporation Limited ïa ki paidbah ka thaiñ Rambrai ka la wanrah shibun ki jingeh kumno ba kin siew ïa ka bai thang bording.
U bah B. I. Nongsiej uwei na ka thaiñ Rambrai, haba ïakren bad u nongthoh khubor mynta ka sngi u la ong ba ha ka thaiñ Rambrai ki don da ki hajar ki longïing kiba la pyndonkam bording ha ki ïing ki sem, hynrei ki shem jingeh pat ban siew ïa ka bai thang bording namar ka jingleh sting palat jong ki nongtrei jong ka MECL.
U bah Nongsiej u la ong ba ha Rambrai ka la don ka Sub Station kaba biang bad ha ka jingshisha u nonglum ïa ki bill na ki nongpyndon kam bor ding ha katei ka thaiñ, u la dei ban sah ha Rambrai la kumno kumno baroh shi snem. Lada um lah ruh ha ki bnai ba la dei ka por ba ki paidbah kin siew ïa ka bai bording u la dei ban sah baroh shi bnai khnang ba ki paidbah kin ym jynjar palat.
U la ong ba haduh kine ki sngi u nongtrei na ka MECL u ba wan lum ïa ka bai bording na katei ka thaiñ u wan tang shi sien lano re. Haba u wan ruh um ju wan ha ka por ba biang hynrei u wan ha ka sngi ba ka tarik ban siew ïa ki bill. U la ong ruh ba katei ka jingleh jong u ka la pynbitar ïa ki paidbah khamtam ïa kito kiba shong ha ki shnong kiba jngai kum sha Mawdoh, Synïa, Rangeisohïong, Umïong, Myrchiang bad kiwei kiwei, namar lada ki leit siew sha Nongstoiñ tang ka bai kali ka la lut lypa saw spah tyngka bad ka bai bording ruh ka nang kiew man la u bnai, nangta sa ka jingduh sngi namar baroh ki dei kiba im ha ka rep ka riang ka la buh ïa ki paidbah ha ka jingeh kaba khraw.
U bah Nongsiej u la ong ruh ba kiwei pat ki jingeh ba ki paidbah ki ïakynduh ka dei ka jingshna bill thurmur jong ki nongtrei hapoh ka ophis MECL Nongstoiñ Division namar kumba ka long haduh mynta la lap ba ki don ki longïing kiba duk tasam kiba pyndonkam bording da kaba thang tang uwei u bulb ba saw zero power.
Hynrei ka bai thang pat ka poi sawspah haduh hynriew spah tyngka shi bnai katba ki don pat ki longïing kiba pyndonkam palat shiphew tylli ki bulb kiba khlaiñ. Nalor kata ki pyndonkam ha kaba shet jingshet, Television, Computer, sait jaiñ, syaid ding bad kiwei kiwei, hynrei ka bai bording ka poi tang kumba ar spah haduh saw spah tyngka shi bnai.
Halor katei ka bynta u bah Nongsiej u la ong ba ki nongtrei ha ka ophis MECL ki la dei ban pyrkhat bniah halor katei ka jngtrei thurmur jong ki, namar lada kat ki nongtrei ophis kim pat nang ban kheiñ jingkheiñ ka long kaei kaei ka bym lah ban pdiang ha khmat ki paidbah.
