Jowai, Ïaïong 01: Ka Jaiñtia Youth Federation (JYF) Jowai Circle mynta ka sngi 1 tarik u ïaïong kala leit ban ujor da ka jingthoh sha u Deputy Commis-sioner ka West Jaiñtia Hills District u bah Garod LSN Dykes (IAS) halor ka jingeh na ka jingsah kut ki ñiut da ki bun bun sngi ha ki bynta ka Ïawmusiang.
Ka seng ha ka jingïakynduh bad u DC kala pynsngew ïa ki jingeh kiba lah ban mih na kitei ki ñiut bala lum thup shi jaka da kaba ong nalor ka jingjakhlia, ka jingbun ki skaiñ kane kala pynmih ruh ka jingsam iwtung bad ka jingthut ha ka leit ka wan jong ki paidbah.
Na ka liang ka seng ka kyrpad jur ïa ki bor District bad ka tnad jong ka Jowai Municipal Board (JMB) ba kin shimkhia ïa kane ka kam da kaba leit siat da ki dawai ïa kitei ki ñiut ba lum thup shi jaka khnang ban pynïap ïa ki khñiang jingpang kiba lah ban ktah ïa ka koit ka khiah jong u Briew.
Halor kane na ka liang u khlieh duh ka District ha ka jingïakren bad ki nongïalam ka seng ula pyntip ba shen un phah ïa ka jingthoh sha ka tnad JMB ban pynlang ïa ki ñiut hala ki jong ki bynta ïew kum ka Iaw tympang, ïaw chor, ïaw seiñ raij bad ban phah siat dawai ïa ki ñiut manla ka sngi.
Ka seng ka la buh ka jingmaham jur ba lada ki bor ba dei peit kim lah ban shim khia ïa kane na ka liang ka seng kan sa leh ïa kaba donkam ha kine ki sngi ban wan, pynkut ka kyrwoh na u Publicity Secretary samla Clifford Max Shylla.
