Ïaksaid ki nongkhaii syiar trai jylla ba shah khñiot ha ki nongkhaii syiar nabar jylla

Shillong, Jymmang, 13: Ki nongdie syiar kiba kynthup naduh ki nongkhaii, ki nongdie khutia bad kiwei kiwei kiba don hapoh ka shatri jong ka All Meghalaya Poultry Supplier and Retailer Association (AMPSRA) ki la ïakynduh mawsiang bha ha kaba ïadei bad ka jingpynïaid iew ïa ka jingdie doh syiar na ka daw ka jingshim kabu shaba palat jong ki nongkhaii kiba nabar ka jylla Meghalaya.
“Ngi kyntu ïa ki nongdie bad ki nongkhaii ba kin ïapoi lang ha ka jingïalang ka ban sa long ha ka 24 tarik mynta u bnai ha Assam Club, Laban ban ïathir ïatai sani khnang ban dup lah ban pynbeit ïa ka dor ka mur. Ngi kyntu ïa ki nongdie syiar naduh kiba die khutia bad haduh ki nongkhaii ba kin pynrung kyrteng ha ka Seng khnang ba kan ym don ka jingdkoh treikam bad ban dup lah ban tehlakam ïa ka jingwan rung jong ki bar jylla kiba la knieh ïa kane ka kam kaba suk kaba ki Khasi ruh ki lah ban trei da kaba leit rung shaduh ki kyndong ki kynshrot jong ka jylla,” ong u President ka AMPSRA u Bah Wanshailang Kharshandi ha ka jingïakren bad ki lad pathai khubor ha ka sngi Palei.
Katkum ka jingïathuh jong une u nongïalam AMPSRA, ka dor jong ka doh syiar Broiler kaba shu die khutia ha iew ha hat ka long T.220 kaba dang im bad T.320 kaba ladep pynkhuid.
“Tang ha Iewduh ka jingdie ïa ki syiar ha ka shi sngi kam duna ïa ka 10 ton,”u la ong.
Haba kylli u la ong, “ha ka Jylla jong ngi lada ïakren ïa ka jingpynmih syiar, ym pat don eiei. Lada ïakren ïa ka Iew Polo, ka Iew Nongmensong, ka Iew Shyllong, ka Iew Happy Valley, ka Iew Laban kine kin poi haduh 30 haduh 40 ton ha ka shi sngi ka jingdie ïa ka doh syiar.”
“Ka jingshim kabu jong ki nongkhaii bar jylla ka long ba ha ka por mynshwa ym don pat ki Khasi kiba die doh syiar bad ki don tang katto katne ngut ki Khasi kiba trei ïa kane ka kam. Namarba ka dei ka kam kaba kham eh, ki Khasi ki kham salia ban tur shakhmat, hynrei naduh u snem 2015 shajrong namar ka jingkyrduh kam jong ki samla, ki la sdang ban tur shakhmat. Da ka jingtur jong ki samla shakhmat, ngi ïohi ba ki khyllah jait ki pyndonkam ïa ki Khasi jong ngi ban pynïaid iew ïa ka syiar,” la ong shuh shuh une u nongïalam ka AMPSRA.
U la kynnoh ruh ba ka jingdkoh treikam jong ka Khasi Hills Autonomous District Council (KHADC) namarba ym shym la tohkit ïa ki nongkhaii bar jylla ki bym don ïa ka Trading License.
“Ha u snem 2019 ngi la ïakynduh wat ïa u Executive Member i/c Trade bad u la kular ban sa leh ïa kaba donkam bad ka kam ka sahkut noh hadien ka jingwan lynshop jong ka khlam jingpang COVID-19,” u la bynrap.
Shuh shuh u la ïathuh ba ki bar jylla kiba wan shalan ïa ki syiar ki dei na Barpeta, Assam, ha Howli bad kiwei kiwei kiba dei hi ki Muslim.
“Lada ïa kren lei lei sa ïa ki Retailer ki bun bha, lada peit sha ka thain Jhalupara, Polo, Nongmensong, Laitumkhrah ki bun bha ki nongdie syiar bar jylla.
U la ong ruh ïa ki syiar kiba la die ha nongbah Shillong ki dei kiba la wan kit naduh ka Jylla West Bengal bad tang ka bai kit kam duna ïa ka jinglut kaba T.35 hajar eiei bad tang ha Checkpost ha Serampore la hap ban siew T.10 hajar bad sa kiwei kiwei de ki jinglut ha lynti kat haduh ban da wanrah shaduh Shillong.
U la ong shuh shuh ba kine ki nongkhaii bar jylla ki ju ïasylla bad ki Kompeni da kaba khñiot dor ïa ki nongdie syiar trai jylla kiba buh ïa ki Farm ri syiar.
“Ka daw baroh ka dei ba ngim don la ka jong ka Hatchery ka jaka pdem jong ki syiar bad ki Mill,” u la ong.