Ïaknieh ki Pulit bad ki sengbhalang ïa ki tynshop hakhmat ka ïingsah u Myntri Rangbah

Shillong, Naiwieng, 26: Ka jingpyrshang jong ki san tylli ki sengbhalang ban thang ïa ki dur tyngshop jong u Myntri ka tnat Kam Pohing u Amit Shah, u Myntri Rangbah ka Assam u Himanta Biswa Sarma, u Myntri Rangbah ka Meghalaya u Conrad Kongkal Sangma hakhmat ka ingsah jong u Myntri Rangbah ka Jylla u Conrad K. Sangma ka la mih ka jingïaknieh bad ka jingpyni nia kaba jur bha bad ki bor Pulit kiba la ap pahara hakhmat ka khyrdop jong ka ingsah u Conrad Sangma ha Polo, Shillong ha ka sngi Saitjaiñ.
Ki san tylli ki sengbhalang kiba kynthup ïa ka Hynñiewtrep Youth Council (HYC), ka East Jaiñtia National Council (EJNC), ka Jaiñtia Students Movement (JSM), ka Hynñiewtrep Achik National Movement (HANM) bad ka Confederation of Ri Bhoi People (CoRP) kiba don hapoh ka lama jong ka Save Hynñiewtrep Mission (SHM) ki la thmu ban thang ïa ki dur tynshop ka long halor ka nongrim ban pynrem ïa ka jingsiat ïap jong ki Pulit Assam ïa ki san ngut ki nongshong shnong jong ka shnong Mukroh, West Jaiñtia Hills ha ka step 22 tarik mynta u bnai ha ka shnong Mukroh.
Ha ka jingïania kaba la neh kumba sawphew san minit, khatduh ki Magistrate bad ki Pulit ki la lah ban pynkohnguh ïa ki dkhot jong ki san tylli ki Sengbhalang ban thang ïa ki dur tynshop hapdeng ka surok mar pyrshah bad ka khyrdop jong ka Orchid Hotel, Shillong kaba jngai kumba shi pda maw na ka ingsah jong u Myntri Rangbah.
Katba ki dkhot jong ki sengbhalang ki dang ïalum ha kane ka jaka hadien ba la wai artat ka jingthang ïa ki dur tyngshop, ar tylli ki kali Gypsy jong ki Pulit kiba dap smam da ki Pulit phong jaiñ ïong kiba wan na ka surok na iew Polo ki la suh beit wut wut lyngba kane ka surok ba ki dkhot sengbhalang ki dang ïalum lymbung.
Kane ka jingpynher stet jong kine ki ar tylli ki kali Gypsy jong ki Pulit ka la pynbitar lem ïa ki dkhot jong ki sengbhalang ha kaba ki la pynkhih win shiphang ha kane ka jaka.
U Superintendent of Police (City) Bah Vivek Syiem bad u Magistrate ka East Khasi HIils u Bah FB Basan kiba don ha kane ka jaka ki la kular ban sa wad ïa kine ki ar tylli ki kali Gypsy ba la shong da ki Pulit kiba la pynbitar ïa ki dkhot sengbhalang.
La sakhi ruh lada ym dei ba ki dkhot jong ki sengbhalang ki kloi ban kynriah, kan jin da la don ka jingmynsaw ha kane ka jingpynher stet jong ki ar tylli ki kali Gypsy jong ki Pulit kiba la suh kum u khnam.
U President ka HYC u Bah Robert Kharjahrin haba kynthoh ïa ka jingbym ailad jong ki Pulit ban thang ïa ki dur tynshop hakhmat ka iingsah jong u Myntri Rangbah u la ong, “ka jingkhanglad jong ki Pulit ïa ngi ban thang ïa ki tynshop hakhmat ka ingsah u Conrad Sangma ka dei ka jingthombor ïa ka sur jong u paidbah. Ha khappud ki briew jong ka Assam ki ïoh ban rung da ki phew kilomitar shapdeng shnong ban siat ïa ki briew hynrei ha ka riti synshar paidbah hakhmat jong ka iing u Myntri Rangbah ngim lah shuh wat tang ban pynlong ïa ka jingïakhih kaba jaijai. Hato, ngi dang im ha ka riti synshar u paidbah?”
U la kynthoh ruh ba ka jingkhang ïa ka Internet ka long ka jingkhanglad ïa ki khynnah skul kiba dang don hapdeng ka jingïakhun eksamin bad ka pynduhnong ruh wat ïa ki samla kiba kamai jakpoh na ka Internet kaba long kum ka jinglute noh ïa ka spah bad ïa ka lawei ba phyrnai jong ka jaidbynriew. “Ka jingkhang ïa ka internet ka long ban pynduna ïa ka jingtlot jong ka NPP ha ka elekshon bad ym don daw shuh da kumwei pat,” u la bynrap.
Haba kynthoh shuh shuh u ong, “lada ka jingkhang ïa ka Internet ka dei na ka bynta ban tehlakam ïa ka shongsuk shongsaiñ, balei ym phah ïa ki Pulit ban pahara sha khappud ha kum kane ka por.”
“Ka jingpynjari ïa ka Section 144 Cr.PC ha baroh kawei ka sor Shillong ka dei tang ban ym shah ïano ïano ban pynlong ïa ki jingïakhih ka long namarba (ka NPP) ïoh ka rem kput. Ko Conrad Sangma, sa katno bnai phin dang sah ha ka iing paidbah?”la kynthoh u Bah Kharjahrin.
“Lada ka Sorkar kam lah ban kem bad ban tian bishar ïa kito ki Pulit bad ïa ki nongpahara khlaw ka Sorkar Assam ha shwa ka elekshon ka pynpaw ba u Conrad Sangma u donkti lang bad ka Sorkar Assam ban bthat jubor ïa ka mynsiem jong ki san ngut ki paradoh parasnam,” la ong u Bah Kharjahrin.
“Ki bahaiing jong kito ki san ngut kiba la khladnoh ki la kren da kaba shai ba ka 5 lak kam don dor eiei ruh em,” u la ong.
“Ngi la kren shai ha Mukroh ïa u Conrad Sangma lada u bat ïa ka kular ba ka jingïapynbeit pud ha ka wat kaba ar kan jia long tang hapoh 45 sngi kan ym wan jia kum kato ka jingjia ha Mukroh. Hynrei namarba ki darapjot ïa ki jingbakla jong ki ha ka jingïapynbeit pud ha ka wat banyngkong, ka thok ka shukor ka paw penryngkew noh,” u la kynthoh.
Haba kynthoh ba ka Sorkar Jylla kam shym la suidñiew ïa ki jingdawa jong ki paidbah ka shnong Mukroh, u la ong, “ki la dawa kam pynroi ruh kim ïoh, ki dawa jingïada ruh kim ïoh, ki dawa skhim ruh kim ïoh, dawa kano kano ruh kim ju ïoh. Ka Sorkar Meghalaya ka la ieh ïa ki shnong khappud sha kyndong,” ula bynrap.
“Ka ladei ka jingbakla jong ngi baroh shikatta ba ngi buh shi buh ha ka khet ïa ki paralok jong ngi kiba la die ym tang ïa ka khyndew hynrei wat ïa ka ïohkam ïohjam,” u la kynthoh.