Nongstoiñ, Nohprah 19 : Ka sorkar MDA ka la pynioh ïa ka C&RD Block ha Ri Muliang bad na ka liang u Myntri Rangbah naduh ki snem ba la leit, u la dep ban pynbna bad buh ruh ïa ka ophis ba treikam ba shi por ha ka shnong Nonglang, ha kaba ka la sdang treikam na ka bynta ka jingdonkam ki paidbah.
Hynrei, lah ban pynkynmaw ba ha ka 14 tarik u Risaw ki nongsynshar shnong ka Nonglang, Mawkapiah, Kyndongngei, Kyrdum, Umwahlang Umbyrsit, Mawsikar, Umwali, Umpha bad kiwei kiwei ryngkat ki paidbah, ki la tur puk sha DC ophis, ban pynpaw ïa ka jingpyrshah kaba jur ïa ka jingthmu jong ki bor ba halor, ban pynkynriah noh ïa ka Ri Muliang C&RD Block office kaba don ha ka shnong Nonglang sha ka shnong Tynghor.
Kitei ki sordar shnong jong katei ka thaiñ ba la ïa donlang ruh u bah Johnes Sohshang Secretary ka Hima Nongmynsaw Syiemship, u bah H.L Tongkhar sordar shnong Kyrdum, ki la ong ba naduh ba la plie paidbah ïa katei ka ophis jong ka Block ha u snem 2022, ym shym la don mano mano ruh ba la pyrshah bad ba la ai jingmut da kumwei pat ha katei ka por bad baroh ki la ïa mynjur lang ban pynskhem ïa ka ban buh beit ha katei hi ka shnong Nonglang.
Hynrei, mynta ka kynti la mih kyndit kynsan sa da kiwei pat ki kynhun kiba la pyrshang ban rah noh ïa katei ka ophis sha ka shnong Tynghor. Ki la ong ba da lei lei kin ym shah ban leh kumta bad dawa ruh ba dei ban pynneh beit ha Nonglang kumba la rai naduh ka sien kaba nyngkong.
Halor katei ki kynrum kynram, katei ka kynhun ka la leit ban buh ruh da ka jingthoh hakhmat utei u ophisar u ba dei u khlieh duh ka District West Khasi Hills, ha kaba na ka liang u DC u la kular ban shimkhia bad pynsngew sha ki bor ba dei peit ïa kane ka kam.
Katba, hynnin ka sngi palei sa ka synjuk ki nongsynshar shnong ka thaiñ Ri Muliang kiba kynthup ïa ki nongsynshar shnong jong ka shnong Tynghor, Nongmawleiñ, Mawthohkrah, Nongkhlaiñ, Rangsahpara, Upper Rangsah, Mawsngi, Umchiak, Mawmareh, Nongthymmai, Dom jaraiñ, Mawkhap, Ktieh Thawiar, Langja, Nunmati, Nongrisan, Athiabari, Silkigri, Baspani, Ranighat, Lejadubi, Nongshyiap bad kiwei kiwei ki sordar shnong jong katei ka thaiñ, ki la pynlong ïa ka jingïalang ban ïakren bad ban ïaphylliew jingmut haba ïadei bad ka jingsdang shna ne tei noh ka sorkar ïa ka Ri Muliang C&RD Block ban buh ha ka shnong Tynghor.
Ïa katei ka jingïalang la pynlong ha ka ophis treikam jong u Sirdar ka Jyrngam Sirdarship, Ri Muliang West Khasi Hills, Tynghor. Hadien katei ka jingïalang, u bah Distarborlin Wanñiang u ba dei u nongaiktien katei ka kynhun ryngkat u bah Cibrasius Riangtem u ba dei u headman jong ka shnong Silkigri, haba ïakren bad u nongthoh khubor ki la pynpaw da kaba ki la ong ba katei ka kynhun jong ki kum ka synjuk, ka la pynkhreh ruh wat ïa ki jaka sah na ka bynta ki nongtrei jong katei ka Block lada ka sorkar kan phah ban wan sdang noh ïa kaban treikam noh ha katei hi ka shnong ha kano kano ka por. Namar ka synjuk kala dep pynbiang lut ïa ki jingdonkam ban phah sah shipor tad haduh ba ka sorkar kan tei da ka ïing kaba kham bit kham biang.
Ki la ong ruh ba ka synjuk ka la dep ban ai ruh haduh 10 Akar tam ka jaka na ka bynta ban buh ïa katei ka ophis jong ka Ri Muliang C&RD Block ha katei ka shnong ryngkat bad kawei ka madan.
Utei u nongaiktien u la ong shuh shuh ba wat haba la don ka kynhun kaba tang da ki katto katne ngut ki briew kiba la pyrshang ban rah jubor ïa katei ka ophis sha ka shnong Nonglang. Hynrei haduh 100 tylli tam ki shnong ki mon ban buh ha ka shnong Tynghor, da kaba ki la pynshisha ruh lyngba ki jingsoi ha ka jingïamynjur lang, da kaba la pynshisha ryngkat ki seal kum ki Sordar shnong jong ki shnong bapher bapher kiba don ha kylleng katei ka thaiñ.
U la ong ba kumba ka long mynta ïa katei ka ophis la sdang ban treikam kum ka ophis ba shi por da kaba pyndonkam lang ha Mawshynrut Block kumba ju leh haduh kine ki sngi. Kumta ka sorkar ka lah dei ban phah noh sha Tynghor kaba dei hok ban buh kumba ka sorkar ka lah thmu naduh ba sdang.
