Shillong, Nailur 10 : U Myntri Rangbah ka Jylla Conrad K Sangma ha ka sngi Balang u la ong ba ka Sorbar jylla ka la shim bun bha ki lad ki lynti ban peit ïa ki jingeh kiba ïadei ban ïakhun ïa ka jingïoh rung beaiñ ki mynder.
Haba jubab halor ka Cut Motion ha Ïing Dorbar ha kane ka sngi Balang, u Myntri Rangbah u la ong ba ka sorkar na ka por sha ka por ka ju kynduh bad ki kynhun bapher bapher kynthup naduh ki Border Security Force (BSF) bad ruh ka Intelligence Bureau (IB), ban ïatreilang ryngkat ryngkat khnang ban khanglad ïa ka jingïoh rung kyrthlep ki mynder.
Na ka liang u Myntri Rangbah u la pyntip ruh ba ka sorkar ka la kyntiew ïa ka jingdon ki nongtrei ha ki checkpoint bad ban pyntikna ba ki shnong ki thaw kin snohkti lang ha ka jingïakhun ban khanglad ïa ka jingïoh rung ki mynder.
“La dep ruh ban bthah ïa ki Deputy Commissioner (DCs) kiba don ha ki jaka khappud ba kin ïatreilang bad ki shnong bad ai ruh ki jingïarap na ka bynta ban khanglad ïa ka jingïoh rung beaiñ ki mynder,” u la ong.
Nalorkata u la ïathuh ba ka sorkar jylla ryngkat ki BSF ki la bteng ïa ka jingtalasi ha ki highway bad kiwei ki jaka kaba la pynlong ruh ïa ki ban ïoh kem bun bha ki briew.
Katkum ka jingong jong u, ka sorkar kam shym la shu peitkai ïa kane ka jingjïa hynrei ka la shim ruh ki sienjam ban tehlakam ïa ki khappud bad ruh ban khanglad ïa ka jingkhihwin.
U ong ruh ba ka la don ruh ka jingïakren halor ka jingshngain ki khappud bad ruh halor ka jingïoh ruh kyrthlep ki mynder ha kaba ïa kane ka mat la ïa kren wat ha ki bynta kiba halor duh ha ka sorkar pdeng.
Da kaba pynpaw ba don ruh ki bynta ba kim lah ban pynpaw paidbah haba ïadei bad ki kam pahara, u Myntri Rangbah u ong ba ka kam jong ka sorkar ka long ban pyntikna ïa ka shongsuk shongsain ki khappud kiba don ha ka jylla.
