Ïakhun bad ki Pulit ban khang tala ïa ka ophis Home Guard and Civil Defence ha Jowai

Jowai, Nohprah 15: Mynta ka sngi ki ‘Home Guard Volunteer’ kiba trei na ka bynta ka khlam Covid-19 ha kine ki snem ba la dep hapoh ka West Jaiñtia Hills, kiba kynthup haka shnong Saphai, Raliang, Amlarem, Phramer, Ummulong bad Jowai, kila leit mih sha ka ophis u Commandant Home Guard and Civil Defence, Jowai da ka jingthmu ban khang tala noh shi syndon ïa katei ka ophis.
Katei ka jingthmu khang tala jong ki ka long halor ka nongrim ba kim pat ïoh ïa ka bainong kaba dang sah, wat hadien ba kiba pyndep ïa ka kam ba la khot da katei ka ophis naduh ka 27 tarik u March 2020 bad pynkhut ha ka 31 tarik u December 2020.
La sakhi mynta ka sngi kitei ki Home Guard Volunteer kila sdang ïa ka jingïakhih da ka jingthmu khang tala ïa ka tei ka ophis ha ka por 12:14 pm nohphai sngi hynrei da ka jingkhanglad jong ki pulit bad ki Home Guard la lah ban pynpulom noh ïa ka jingkhang tala, ha ryngkat ka jingwan hiar jong u Magistrate bad ki ophisar pulit.
Hashwa kane ka la don ka jingïaleh kaba jur bha hapdeng kitei ki Home Guard Volunteer kiba thmu ban khang tala, ha kaba ki pulit kiba khang pyrshah bad ka la don ruh ka jingmynsaw malu mala ki katto katne ngut na baroh arliang.
La ïathuh ba kitei ki Homeguard Volunteer kiba don kumba 112 ngut kum ki Homeguard Volunteer hapoh ka West Jaiñtia Hills District kiba la dep ban trei ïa katei ka kam haduh 280 sngi ha ka dor T.550 tyngka shi sngi, katba ka bai nong kaba kila dep ïoh ka long tang 131 sngi kaba dang sah ka long sa kumba 149 sngi.
Halor kane ki pynpaw ka jingsngewsih kaba khraw ba haduh mynta la jan shisnem kim pat ïoh lut ïa ka bai nong sngi kaba ki la dep trei ha u snem 2020 wat haduh mynta u snem 2021 ruh ka sorkar kam pat dep pyllait ïa ka bainong kaba ki dei hok ban ïoh.
Hadien ka jingïakren na ka liang bad ki bor pynïaid District kila pyntip ba ka ophis u Deputy Commissioner ka WJHD kala dep ban phah ïa ka jingthoh sha ka Executive Director, State Disaster Management Authority Meghalaya Shillong ban pynsngew ïa ka bainong ba dang sah jong kitei ki Homeguard Volunteer ha ka por ba ïakhun ïa ka khlam Covid-19 la ïoh jingkheiñ na ka District Home Guard Commandant WJHD ba ka pisa ba dang sah ka long 76,13,283/- tyngka.
Katkum ka jingïathuh jong kitei ki nongtrei Volunteer na ka por sha ka por ki la dep ban leit ujor ïa kane sha ki bor kiba dei peit hynrei kila la ïoh jubab ba ka jingkynnoh ka mih na kawei ka ophis sha kawei pat, da kaba ong ‘haba kila leit ud leit nam sha ka ophis u Commandant Home Guard kila kynnoh kylla sha u Deputy Commissioner ka WJHD hynrei na ka liang u DC ula kynnoh ba ym pat pyllait pisa ka ophis SDMA, haba kitei ki nongtrei Volumteer kila leit sha SDMA ki ïoh jubab da kaba ong bym pat pyllait ka NHM bad kane ka la buh ïa ki ha ka jinglyngngoh halor katei ka bai nong ba dang sah.
Na ka liang u ma Challam (EAC) ula kular ba lada ka pisa ka poi ha kano kano ka por kin pynkloi katba lah ban phah pynpoi sha kitei ki Home Guard Volunteer.
Kawei na ki nongtrei Home Guard kala pynsngew ha ki lad pathai khubor ba kane ka jingïakhih ka long tang ka jingsdang bad lada ka sorkar kam lah ban pdiang ïa kane ka jingdawa hapoh une u bnai kin sa pynlong biang ïa ka jingïakhih kaba kham tyngeh.
Kila pynpaw ruh balei ka sorkar jylla ka lah ban pynlut da ki klur tyngka ha ka Festival ‘Cherry Blossom’ kaba dang shu dep shen ha nongbah Shillong, katba ïa ka bainong jong ki pat kam lah satia ban siew dep wat hadien ba kila dep trei ïa ka kam.
Kitei ki nongtrei Home Guard Volunteer kila dawa ha ka juh ka por ban pynkynriah kam noh ïa utei u Commandant jong katei ka ophis Home Guard and Civil Defence, Jowai, namar ka jingbym sngap jong u ïa ki jingdawa bad u bym treh ruh ban ïakren lada ki donkam ban pan jingïarap na katei ka ophis, la ong kitei ki Home Guard Volunteer.
Kitei ki nongtrei Volunteer kila pynsngew ba kane ka jingleh ka sorkar ka long kumba pynkheiñ ïa ka hok jong ki kaba ki dei hok ban ïoh, kila ong ba kane ka jingeh ba kila dep ban ïaishah la shi snem mynta bad na ka liang jong ki kin dang bteng ïa kane ka jingïakhih tad haduh ban da ïoh ïa ka jingdawa kaba ki dei hok ban ïoh hapoh jong une u bnai.