Shillong, Nailur 01: Ka la don ka jingïa hylla mar pyrshah hapdeng ki dkhot ka BJP bad ka Congress kaba la sawa bha ha nongbah Shillong hadien ba ki dkhot ka BJP ki la leit ban pynlong ïa ka jingïakhih hakhmat ka Congress Bhavan ha ka sngi Nyngkong.
La ong ba kane ka jingïakhih ba la pynlong da ka Meghalaya BJP ka la mih na ka jingkren pynjah burom da uwei u dkhot ka Congress napoh ka Jylla Bihar pyrshah ïa ka kmie kaba la khlad jong u Myntri Rangbahduh ka ri u Narendra Modi.
Ha kaba ïadei bad kane na ka liang jong ka seng ka Congress ka la kyntait ïa kane ka jingkam jong ka BJP da kaba kynnoh ba kane ka jingïakhih ka dei ka buit saiñ pyrthei ban pynklet ïa ki paidbah ka ri halor ka ka mat tuh vote da ka ba BJP.
Ha kaba ïadei bad kane haba kren sha ki lad pathai khubor u president ka BJP Yuva Morcha, u Bah Mewaker Lyngdoh u la pynksan ïa katei ka jingïakhih hakhmat ka ophis treikam ka Meghalaya Congress, da kaba ong ba ka dei ban pyrshah ïa ka jingkren beiñ ïa ka kmie jong u Myntri Rangbahduh, da u nongtrei jong ka seng Congress, u Mohammed Rizvi, uba la shah kem noh ha ki Pulit.
U Bah Wewaker ula ai khublei ruh ïa ki pulit kiba la shimkhia bad kem noh ïa u Rizvi. Ula pynbna ba ka BJP kan nym pynlong tang ïa ka jingïakhih hakhmat ophis ka Congress hynrei ka thmu ruh ban pynlong da ka jingïakhih hakhmat ophis jong ka Trinamool Congress (TMC), namar ba ki ngeit ba haduh mynta ym pat leh eiei pyrshah ïa ka MP ka TMC ka Mahua Moitra halor ka jingkynnoh ba ka la kren pynjah burom ïa u Amit Shah.
Ka Meghalaya BJP ka la ujor da ka zero FIR hakhmat u SP jong ka East Khasi Hills ban dawa ban leh eiei pyrshah ia u Moitra. U la pynpaw ba kum u nongmihkhmat ym lah ban kren khlem jingkitkhlieh kiba wanrah ïa ka jingïapher hapdeng ki briew.
La ong ba katkum ka jingong jong u, ka BJP ka ïeng na ka bynta ka roi ka par, ka jingsuk, bad ka jingïatylli hapoh ka ri baroh kawei.
