Nongpoh, K’Lyngkot 30: Ha ka sngi jingïap u Mahatma Gandhi (Martyrs’ Day), ki nongïalam ka Ri Bhoi District Congress Committee (RBDCC) ki la pynlong ïa ka jingïakhih kaba jai jai ha ïew Byrnihat ban pynpaw ïa ka jingpyrshah ïa ka rai jong ka Sorkar BJP ban pynkylla ïa ka Skim MGNREGA sha ka Viksit Bharat-Guarantee for Rozgar and Ajeevika Mission (Gramin), kaba la tip kum ka VB-G RAM G Act, 2025.
Ki nongïalam Congress ki la ong ba kane ka jingpynkylla ïa ka skim kam dei tang ka jingkylla kyrteng hynrei ka dei ka jingpynkylla ïa ka jingïohkam ïohjam jong ki paidbah nongkyndong. Watla ka Sorkar Pdeng ka la pynpaw ba ka VB-G RAM G ka kyntiew ïa ki sngi trei na ka 100 sha ka 125 sngi kum shi bynta jong ka thong Viksit Bharat 2047, hynrei ki la ong ba ka skim thymmai ka la pynduh noh ïa ki bynta ba kongsan jong ka MGNREGA.
Ha kane ka jingïakhih, ka RBDCC hapoh ka jingïalam u President Bah Rocky Marweiñ, ryngkat bad u Secretary Bah Defender Lamare, u President ka Jirang Block Bah Phrangsngi Syngkli, lem bad kiwei kiwei ki nongkitkam, ki la rah ïa ki placard bad pynpaw paidbah ïa ka jingdawa ban pynneh ïa ka Skim MGNREGA ha ka dur jong ka mynshwa.
Haba kren sha ki lad pathai khubor, u Bah Rocky Marweiñ u la ong ba hapoh ka MGNREGA, ki paidbah ki don ïa ka hok ban dawa kam, hynrei kane ka hok kam shym la long shuh hapoh ka aiñ thymmai. U la kdew ruh ba ka MGNREGA ka treikam ha baroh ki shnong, hynrei ka VB-G RAM G kan treikam tang ha kito ki shnong kiba shah jied da ka Sorkar Pdeng.
U la bynrap ba hapoh ka MGNREGA, ki shnong ki don ïa ka bor ban rai ïa ki kam lyngba ka Village Employment Council (VEC), hynrei hapoh ka skim thymmai, ïa ki kam yn pynïaid bad rai hi da ka Sorkar Pdeng bad ki shnong ne ki VEC kim don bor shuh ban tuklar ïa katei ka skhim.
Ka RBDCC ka la pynpaw ïa ka jingpyrshah kaba jur ïa ka jingpynduh ïa ka kyrteng u Mahatma Gandhi na kane ka skhim, khamtam haba ka jingïakhih ka la long ha ka sngi ban kynmaw burom ïa u. Ka seng ka la dawa ïa ka Sorkar Pdeng ban weng noh ïa ka VB-G RAM G bad ban wanrah biang ïa ka skhim MGNREGA kumba ka long mynshwa, na ka bynta ka jingïada ïa ka jingïoh kam ïoh jam jong ki paidbah nongkyndong.
