ïakhih ka Congress ha baroh ka ri ba kiew dor ki mar bam shah bat ki nongïalam ha Delhi

Shillong/ Delhi, Nailar, 05 : Ki nongïalam bad ki dkhot jong ka seng Congress ha kylleng ka Ri India baroh kawei kumjuh ruh ha Meghalaya ki la pynlong ïa ka jingïakhih ban pynpaw ïa ka jingpyrshah halor ka jingkiewdor jong ki marbam mardih, ka jingkiew dor jong u tyndong lyer shet jingshet (LPG Gas) bad ka jingkyrduh kam kyrduh jam ki samla.
U General Secretary jong ka Meghalaya Pradesh Youth Congress, Shillong City u Bah Anish syiem u la pynkynmaw ba ha ka por ba dang synshar ka Seng Congress ka dor jong u tyndong lyer shet jingshet u dang long tang T.400 hynrei mynta ka dor ka la poi haduh T.1200 spah kat haduh ba ka la ktah ïa ki longïing longsem kiba duk ba kyrduh.
Ka jingkiew dor kam dei tang ïa u tyndong lyer shet jingshet hynrei wat ki marbam kum u khaw, u dai, ka shini ruh la pynngat hapoh jong ka Goods and Services Tax (GST) ha kaba ki longïing baduk ki lynñiar ïa ka jingkiewdor bad ym tang katta wat ki jhur ruh ki la kiew dor shaba palat bad kumjuh ruh ka doh.
Kum kaParty, ka seng Congress ka la pynpaw ïa ka jingpyrshah bad ban pynsngew sha ka Sorkar National Democratic Alliance (NDA) ba la ïalam da ka BJP ba ka dei ban pynrkhat lem ïa ki baduk bad ha kajuh ka por. Ka Congress ka la pynrem ruh ba kane ka jingpynkiewdor ka dei ka jingpynjynjar ïa ki paidbah.
Kawei na ki riew kynthei kaba la wan ban ïashim bynta sha kane ka jingïakhih ka la ong ba lada peit ïa ka dor jong ki jhur ka la kiew shaba palat hynrei kane kam poi sha ki nongrep namar haba ki leit sha ïew sha hat ban siew ban tda ka jingkiew dor ka long shaba palat. Ka la kyntu ïa ki paidbah ba kin ïa pyrkhat bha ïa kane.
Ha kane ka sngi da ki spah ngut ki nongkyrshan ka seng Congress ki la ïashim bynta ha ka jingïakhih.
Ha nongbah Delhi ki nongïalam ka Congress ba kynthup ïa ka Priyanka Gandhi Vadra, Rahul Gandhi bad kiwei kiwei ki nongïalam ki la pynlong da ka jingïaïaid paidbah hakhmat ka Iing Dobar Thawaiñ Parliament , kumjuh ruh ha ka ophis jongka AICC bad mut ïaid sha Rashtrapati Bhawan hynrei la khanglad noh ïa ki da ki pulit. Ryngkat ki jingriam ïong la ïa pyni bor mynta ka sngi bad ki bor pulit ha Delhi. Ha kane ka jingïapyni bor ki nongïalam ba kynthup ïa u Rahul Gandhi, K.C Venugopal, Ahir Ranjan Chowdhury, Gaurav Gagoi lem bad 64 ngut kiwei ki MP ki la shah rah na Vijah Chowk da ka bus ki pulit.
New Delhi: Ha ryngkat ki riam rong ïong, ki nongïalam ka Seng Congress, ym tang ba ki la pynkheiñ ïa ki kyndon aiñ CrPC, hynrei ki la kiew ruh ïa jingker nar jong ki Pulit ban pyrshah halor ka jingkiew dor ki mar ki mata, ka jingshah khynra ki nongïalam ha ka Enforcement Directorate bad ka jingpynkiew ïa ka khajna Good and Services Tax (GST).
Ka Priyanka Gandhi, ka la tur pyrshah ïa ki Pulit bad kiew ruh ïa ki nar ba ki la ker. Nangta ka la shong lyngngeit ha madan, haba ki Pulit ki la pyrshang ban tan jubor ïa ka.
Kane ka la jia mynta ka sngi, haba ki Congress ki la tur sha Rashtrapati Bhavan. Ïa kane ka jingïakhih pyrshah, ka Congress ka la thmu ban pynlong naduh ka taïew baladep da kaba thmu ruh ban gherao ïa ka ophis jong u Myntri Rangbah Duh,m u Narendra Modi.
Hynrei ki Pulit ki la khang pyrshah ïa ki bad ler da ki jingker nar ba ki ju pyndonkam haba don ki jingïakhih ha nongbah Delhi.
Ka jingïatur paidbah hapoh ka jingïalam ka Sonia Gandhi, ki la sdang ka jingïaid paidbah na Parliament Building ha kaba la ïadon lang u P. Chidambaram, u Mallikarjun Kharge, u Jairam Ramesh, Ranjeet Ranjan, u Rahul Gandhi, ka Priyanka Gandhi Vahdra kiba la riam da ki jaiñ ïong. Hynrei namar ba ki Pulit ki la ker pahara bha da ki briew bad ki jingker nar, ka Priyanka Gandhi kynsan kynsan, ka la kiew ïa kine ki jingker ryngkat ka pyrta shla ïa ka sorkar jong u Modi.
Kiba bun ki nongïalam jong ka Congress ki la shah kem bad shah rah sha Thanad. Hynrei hadien 6 kynta la pyllait noh ïa ki.
Ki heh ka Congress, ki la kynnoh ba kane kadei ka jingleh donbor ka sorkar u NDA bad hapoh ka jingïalam u Narendra Modi bad u Amit Shah, ka ri India ka la kylla long ka ri ba synshar donbor ne ka jingsynshar diktator. “Ka jingsynshar paidbah ha ri India, ka la ïap noh”, la ong ki nongïalam ka Party, da kaba ong ba ka jingïakhih jong ki, kadei namar ka ïap ka im jong u paidbah.
Hynrei u Amit Shah pat u la pynkylla da kumwei ïa kane ka jingïakhih ka Congress da kaba ong ba kadei ka jingïakhih jong ki ban pyrshah ïa ka jingtei ïa ka Temple u Ram ha Ayodhya, namar dei ha kane ka sngi shi snem mynshuwa u Myntri Rangbah Duh, u Narendra Modi, u la plie ïa u mawnonrgim ban tei ïa ka Temple u Ram ha katei ka jaka ban wanrah ruh artad ïa ka jingkut noh ka jingïakajia kaba la neh la palat 500 snem.