Shillong, Lber 31: U bah Adrian C Mylliem President jong ka Meghalaya Pradesh Youth Congress (MPYC) u la pynpaw ba ka seng ka la sdang ban ïakhih pyrshah halor kane ka jingkiew dor palat pud ki mar ki matta bad kane ka jingïakhih kaba sdang mynta ka sngi ka dang long tang kum ka jingsdang kin dang ïai pynjur shuh nangne shakhmat ban pynbor ïa ka sorkar ba ka dei ban leh ei ei halor kane ka jingkiew dor.
Haba kren ha ki lad pathai khubor ha Congress Bhavan mynta ka sngi la ong ba ka jingkiew dor kaba man ka por ka Diesel bad ka Petrol ka ktah ïa ki duk ki rangli bad ka jingkiew dor ka umphniang ka ktah lut baroh ki mar ki mata, la ong kum ka Umphniang bam mynta ka la kiew dor sha ba palat.
ïa kum kane ka jingïakhih ban pyrshah ïa ki mar ki matta kan long biang la sngi saitjaiñ bad la khot la wer ïa baroh ban ïa snoh kti lang ha kane ka jingïakhih ka ban long ha ka por shibaje shiteng sngi. U kyntu ïa ki paidbah ban ïa mih sha khmat ha katei ka sngi.
Ka jingeh kaba long mynta kam don ka jingkiew ha ka ïoh ka kot ha ka jylla hynrei ka don tang ka jingkiew dor ki marbam mardih bad kane ka ktah ïa ki paidbah kiba duk ba rangli jong ka jylla, lada ka don ka jingkiew ha ka ïoh ka kot lada kiew dor ruh kan nym ktah palat hynrei ka ïoh ka kot ka hiar katba ka jingkiew dor ka kiew kane ka ktah ïa ki paidbah.
