Shillong, Naiwieng 08: Ka Nongkseh SC bad ka Mawtawar SC ki la ïasam mar shi point hadien ba ïakhaid mar 2 kol ha ka jingïalehkai ka lympung First Division Football League 2024 jong ka Shillong Sports Association, kaba la long ha ka sngi Thohdieng (08.11.2024) ha SSA Stadium, Polo.
Lah ban kdew ba dei lyngba u Khrawkupar Nongbri ka Mawtawar ka la lait na ka namrem, ha kaba u la pynïakhaid ar sien ïa ka kynhun hadien ba shah lamkhmat ha ka kylla step bad ruh ha ka kylla miet.
Ka Nongkseh ka la pynkhihjar nyngkong lyngba ka kol ba la kum thep hi da u rangïalehkai ka liang pyrshah – u Wallam Dkhar ha ka 36 minit hynrei shuwa ban kut ka kylla step u Khrawkupar Nongbri (45+2 min) u la pynïakhaid na bynta ka Mawtawar.
Katto katne por ba la ïaid ka kylla miet ka Nongkseh ka la ïoh biang ban lamkhmat lyngba u Chesterpaul Lyngdoh (63 min), hynrei sa shisien pat u Khrawkupar Nongbri u la pyllait im ïa ka Mawtawar da kaba thep ïa ka kol ha ka 86 minit kaba la pynthikna ban ïasam mar shi point.
