Shillong, Naiwieng 06: Ka Shillong Lajong FC bad ka lahduh ba ïada ïa ka burom – ka Mawlai SC ki la pynhun jrut ïa u paid nongkyrshan da ka jingïalehkai kaba itynnat jong ki kaba la kut ha ka jingïakhaid da mar 1-1 ha ka lympung OC Blue Shillong Premier League 2024 kaba la long ha SSA Stadium – First Ground, Polo, ha ka janmiet sngi Balang.
U Damanbhalang Chyne (70’) u la pynkhihjar nyngkong na bynta ka Mawlai hynrei u Yohaan Benjamin (82’) u la lah ban pynïakhaid na bynta ka Lajong hadien satang 10 minit eiei ba sah ka por shuwa ban kut.
Kane ka dei ruh ka jingïakhaid kaba ar hadien 16 tylli ki jingïalehkai ba la ïaid mynta ka samoi bad ka jingïalehkai ka la long kaba mar ïa biang hapdeng kine ki arliang mamla. Ka jingïakhaid kamut ba ka Lajong ka dang ïai bat ïa ka kyrdan ba hakhliehduh jong ka miej kheiñ point ka OC Blue SPL 2024. Baroh ar tylli ki kynhun, ka SLFC bad ka Mawlai ki la ïoh mynta 7 point hynrei ka Lajong ka ïoh ban lamkhmat lyngba ka jingïapher kol (goal difference) (Lajong +5, Mawlai +4).
Ki snar thep kol (top scorer) jong baroh ar tylli ki kynhun kim shym la lah ban don bynta ha kane ka jingïalehkai – ha kaba na ka Lajong u Deibormame Tongper u la shong ben khlem da mih madan, katba u Khrawkupar Jana jong ka Mawlai’ u la mih madan tang kum u substitute hadien ba shah pynïakhaid.
Watla ka kylla step ym shym la don ba pynkhihjar hynrei ki la don katto katne ki kabu ksiar kiba la pynsmiej na baroh arliang.
Ka la shimpor palat shi kynta ba ka kol ba nyngkong kan urlong hadien ba u Robert Khongriah u la pashat thikna ïa ka bol na ka corner kick ha kaba u Damanbhalang u la shu donkam ban pyndei tiak da ka khlieh ban pynkhihjar.
Shiphew mininit hadien ka Shillong Lajong ka la ïoh ban pynïakhaid. Kane ka kol ka la urlong lyngba ka bol pashat ba la pynbuh da u Kynsaibor Lhuid na bynta u Yohaan ban pynïakhaid mar kawei (1-1 kol).
Kane ka shi point ka long kaba kongsan na bynta ka Lajong ban bteng bat kyrdan hakhlieh duh jong ka miej hynrei na ka liang jong ka Mawlai ka tip shai ba ka lynti ka dang jngai ban ïaid lyngba kane ka lympung OC Blue SPL mynta u snem.
Ka jingïalehkai ha kane ka sngi Palei yn sakhi ïa ka Sawmer SC ka ban aireng pyrshah ïa ka Langsning FC ha ka por 2 shiteng mynsngi.
