Shillong, Ïaiong 01 : U Myntri Rangbah ka Jylla Conrad K sangma ha ka sngi Balang u la pyntip ba ka jingshna ïa ka LPG Bottling Plant ha Meghalaya kaba la khmih lynti la slem bha shen yn sa lah ban pyndep noh. Haba kren bad ki lad pathai khubor, u Myntri Rangbah u la ïathuh ruh ba ka jingshna ïa kane ka jingtei ka la don ha ka kylla kaba khatduh ban pyndep noh artad. “Kadei ka kam kaba la sahteng la kham slem mynta bad dei kane ka sorkar kaba shim ïa ka sienjam bad ai ka jaka bad mynta ka kam ka la ïaid shakhmat,” u la ong.
Ha kajuh ka por u la ong ba ki kam bunsien hi shim por ban pyndep namar ym lah satia ban khmih lynti ba ka jingtei kan dep noh watla ka jingpyntrei ka ïaid stet. “Kumta, ngi khmih lynti ba yn sa lah ban pyndep noh shen,” u la ong. Nangta, u ong ruh ba ïa kane ka jingtei la dep ban don naduh mynshwa hynrei dei kane ka sorkar kaba shim ïa ka sienjam da kaba ai jaka bad mynta ki don ha ka bynta ban pyndep noh artad.
