Khliehriat iaiong 21: U Deputy Commissioner, uba dei ruh u Chairman jong ka District Disaster Managemnt Authority, East Jaiñtia Hills District, u kyntu ïa ki paidbah ba kin sngewbha ban ïaid shwa da kawei ka lynti kiba napoh shnong na Khliehriat West bad Khliehriat East ha ka por mynmiet katba ki nongtrei jong ka NHAI ki dang maramot ïa ka surok ha Khliehriat.
Ka jingpyntrei ïa ka jingmaramot ïa ka surok ha Khliehriat East bad Khliehriat West kan sdang naduh ka por 9 baje mynmiet haduh ka por 5 baje mynstep kumta hapoh kitei ki kynta la kyntu ïa kiba ïaid lynti da ki kali heh bad ki kali rit ba kin ïaid noh napoh ki suroh shnong kiba pyniasoh bad ka surok national highway ha kaba ki don ki surok ba hap ban iaid One Way.
Ki kali rit ha ka por mynstep bad por myn sngi ki lah ruh ban ïaid na ka surok shnong kiba lah ban pyniasoh bad ka surok national highway, kiba don hapoh shnong Khliehriat West bad Khliehriat East, khnang ban pynsuk ïa ki kali kiba ïaid tang shi liang ne one way traffic tat haduh ban dep ka jingmaramot ïa ka surok bah national highway ha Khliehriat bad halor kane ki bor synshar district ki la pan ka jingiatreilang na ki paidbah ban ïaid kumba la pynbeit.
