SHILLONG, Kyllalyngkot 30: Ki resol jong ki jingïalehkai ka lympung U-14 Football league 2025-26 ba la pynïaid da ka Shillong Sports Association hynne ka sngi Thohdieng (30.01.2026) ha madan SSA Ground, Polo.
Ha ka jingïalehkai ba nyngkong ka Nongthymmai Nongkynrih SC ka la pynliem noh da 6-1 kol ïa ka Nongkolew SC. Kiba la pynkhihjar na ka bynta ka Nongthymmai Nongkynrih SC ki long u B.Nongrum (11’), D.Sun (26’), D.Kurbah (40’), H.Kurbah (47’), D.Shabong (54’) bad u H L Marshillong (56), katba na ka Nongkolew la thep da u S.Jyrwa (30).
Nangta ka Lumshyiap SC ka la jop da 3-2 kol ïa ka Umlyngka SC. Ki lai kol jong ka Lumshyiap la thep da u E.Pale (7 & 56) bad u D.Shadap (20). Katba ka Umlyngka la thep da u A.Ryntathiang (4’) bad I.Thabah (60’).
Ka Smit SC ka la pynliem da 3-0 ïa ka Rangdajied United FC lyngba ki kol ba la thep da u S.L Nongbri (10’), D.Warlarpih (31’) bad B.Warjri (49’).
Kumjuh ruh, ka Mawkhar SC ka la jop da 3-0 ïa ka Mawshbuit SC lyngba ki kol ba la thep da u B.Ryntathiang (16 & 17’) bad N L Nonglait (20’).
Ka jingjop kaba shyrkhei tam ka la wan na ki khynnah ïalehkai jong ka PFR, kiba la pynliem haduh 12 – 1 kol ïa ka Marbisu SC, ha kaba u H.Blah (7, 8, 30, 32, 34 & 39’) u la thep 6 kol marwei. Kiwei pat ki kol la thep da u B.Dkhar (16), N.Kharkongor (31 & 46), O.Kharir- (50 & 60) bad u N.Kharumnuid (52’).
Ha ka jingïalehkai ba khatduh, ka Shillong Lajong FC ka la pynliem haduh 8-0 ïa ka Mawtawar SC. Ki kol jong ka SLFC la thep da u M.Marwein (15 & 23), M.Nongkynrih (19’), W.Nongsiej (26’), B.Dohtdong (35’), S.Mawthoh (37’), M.Thabah (39) bad u D.Nongpiur (43’).
