ïaid shaid shaid ka jingtei ïa ka madan ki tamasa ha New Shillong kaba mang 101 klur tymgka

Shillong, Rymphang 19 : U Symbud Myntri Rangbah ka jylla ba dei peit ïa ki kam pynroi sor U Ma Sniawbhalang Dhar ha ka Sngi Palei ula pyntip ba ka project shna madan pynlong ïa ki tamasa ba bun jait (multi-purpose event ground) ha ka jaka ba 17 acre ha New Shillong ka dang ïaid shaid shaid mynta bad ka jingmang pisa ka long haduh 101 klur tyngka.
“Ka project ka la ïaid shaid shaid bad kane ka madan tamasa kan don hapoh ka Knowledge City ha New Shillong, ka ban don marjan ka Stadium, kaba la mang pisa haduh 101 klur tyngka. Kane ka madan kan ngiam haduh 60-70 hajar tam ki briew nalor ka jaka pynïeng kali ha Mawkhanu marjan ka Football Stadium” ong u Ma Sniawbha haba jubab ïa ka resolution ba la wanrah da u MLA ka North Shillong Bah Adelbert Nongrum ha ïing Dorbar.
Ula kren halor ka thong jong ka Sorkar ban pynlong ïa ka Shillong kum ka sor ba thaba bad ba don lut kiei kiei baroh, bad ka jaka paidbah ka ban plie ïa baroh.
Ka sienjam kum ka jingpynkylla dur ia ka Nan Polok, ban pynitynnad biang ia ki rud Wahumkhrah bad kyntiew kyrdan ia ka Phan Nonglait Park kila iaid shakhmat.
U pyntip ba ïa ka jaka ba don harud ka Wah Umkhrah ha Polo, la shna pynitynnad ïa ka kum ka Meghalaya Riverfront Project ba nyngkong eh, kaba la ïaid shaid shaid mynta bad kane kan sa pynthaba ïa ka thaiñ da ki madan jyrngam, ki jaka ïaid kjat, bad ki jaka ïakynduh ba shngaiñ jong ki samla kynthei bad shynrang.
Hapdeng eh jong ka sor, u ma Sniawbha ula ong ba wat ïa ka thain Barik yn shna ïa ka kum ka Open Public Plaza bad kane ka project ka thmu ban pynkylluid ïa ki surok nalor ban ai jaka ïa u paidbah ba un pyndonkam. Kumjuh ruh ïa ka Phan Nonglait Park la kyntiew kyrdan da ki jingshna ba kham bha, ka lynti ïaid ba shngaiñ ïa ki nongleit nongwan bad kiwei kiwei.