Nongpoh, Naiwieng, 15: U MLA ka Nongpoh u Bah Mayral Born Syiem ha ka sngi Thohdieng u la lum da ka jingïalang ïa ki ophisar ka tnad PHE bad kumjuh ruh ki nongïalam shnong ban mir jingmut halor ka jingpyntrei shaid shaid ïa ka Greater Nongpoh Water Supply Scheme (GNWSS) kaba dei ka skhim JJM ba la mang pisa kumba T. 103 klur lyngba ka Ministry of Jal Shakti jong ka Sorkar Pdeng bad kumjuh ruh ka jingpynmang na ka skhim jong ka Sorkar Jylla.
Hadien ka jingïalang mir jingmut ha Conference Hall jong ka DRDA halor ki jingeh kiba bun bad ba ki Dorbar Shnong ki dei ban ai ka jingïatreilang, na ka liang u Bah Mayral Born Syiem MLA ka Nongpoh, ha ka jingdonlang u Bah U Kurbah EE ka PHE Nongpoh Division, ki ophisar lem bad ki nongïalam shnong ki la leit ruh ban jurip ïa ka jaka ba la shna ïa ka Treatment Plant ha ka shnong Mawdiangum bad lyngba katei ka skhim shen ki paidbah nongshong shnong jong 20 tylli ki shnong ha ka thaiñ Nongpoh kin sa pahuh um.
Haba kren sha ki lad pathai khubor na ka liang u Bah Mayral Born Syiem u la ong ba kum u MLA u la shimkhia ban lum da ka jingïalang mynta ka sngi naduh ki ophisar ka tnad PHE ha ka jingdonlang ki nongïalam shnong ban ïakren ïa kiba bun ki jingeh ba kum ki nongïalam shnong ki dei ban ai ka jingïatreilang ban pynïaid beit ïa ka jingpyntrei ïa katei ka skhim kumba ka jingpyntrei ïa ka Treatment Plant ka la ïaid shaid shaid bad mynta ka kam ka la ïaid kumba 65% eiei.
U la pynpaw ruh ka jingsngewkmen kaba khraw ba katei ka kam ka la ïaid sted watla ki don shibun ki jingeh ha ka jingpyntrei ïa katei ka kam bad kum u MLA u la sngewhun ïa ka jingpyntrei ïa katei ka kam da ka BAC Infratech Pvt Ltd kaba la trei shaid shaid katkum ka jingbthah jong ka tnad PHE bad ngeit skhem ba ka thaiñ Nongpoh shen kan sa pahuh um lyngba ka kateika skhim baan sa pynpoi sha man la ki thliew iing.
U la kyrpad ruh ïa ki paidbah nongshong shnong ba kin ïai shah shipor katba ka kam ka dang ïaid shaid shaid watla bun naki shnong ki mad ka jingkyrduh um kaba khraw bad ngeit skhem ba kane ka project yn lah ban pyndep kloi katba lah na ka bynta ka jingbit jingbiang jong ki paidbah nongshong shnong jong ki shnong ka thaiñ Nongpoh hi baroh kawei.
U EE ka PHE Bah U. Kurbah u la ong ba bun naki top um ha ki shnong la nang pyndep shaid shaid bad kaba sah mynta ka long sa ki jingpynpoi ïa ki pipe um sha ki shnong ki thaw, bad ïa ka jingpynïaid ïa ki pipe um yn sdang noh ha ki bnai ban wan bad kaba sah mynta shakhmat ka long ban pyndep noh ïa katei ka TP bad kumjuh ruh ban pyndait ïa ki mashin.
Ka tnat PHE ka ai ruh ka jingkhublei ïa u MLA ka Nongpoh u ba la shimkhia ban lum ka jingïalang na ka bynta ban pyndep kloi ïa katei ka kam bad kum ka tnad PHE ruh kan sa bthah ïa ka kompani ba pyntrei ïa katei ka kam ban pyndep katba lah ïa katei ka kam.
