Nongstoiñ, Nailar 27: Ka jingpyntrei ban pynbha bad siang rong ïa ka surok na Risiang sha shnong Riangpoit kaba jngai kumba san kilomitar ka la ïaid shait shait la kumba katto katne bnai bad ïa katei ka surok yn sa lah ban pyndep hapoh u bnai Lber jong u snem ban wan.
Kitei ki ar tylli ki shnong ka Risiang bad ka Riangpoit ki dei ki ba hap ha ka Mawshynrut Constituency bad dei ha ka Election 2023, ba ki paitbah katei ka thaiñ ki la kyrpad ïa u bah Methodius Dkhar MLA ka Mawshynrut, ba un pynsngew sha ka sorkar ba kan pynïoh surok bad lyngba ka jingshimkhia bad ka jingtrei shitom jong u, ba ka sorkar ka la phai khmat bad mang pisa na ka bynta ban pynpoi surok rong haduh shnong Riangpoit.
U bah Dominik Tyrsa uwei na ki riew rangbah ka shnong Riangpoit haba ïakren bad u nongthoh khubor, u la ong ban ka shnong Riangpoit ka dei ka shnong kaba la rim haduh katta katta. Haduh kine ki sngi ka la don palat shispah snem bad ki paitbah ki dei kiba im da ka rep ka riang ri jingri kum ki masi, blang, syiar sniang bad kiwei kiwei bad ki nongshong shnong ki dei kiba smat bha ban rep soh.
U la ong ruh ba ma u kum uwei na ki riew tymmen u dei u nongri masi naduh dang khynnah bad mynta u don palat shi spah tylli ki masi khlem kheiñ ïa ki masi khun kiba dang kham rit bad kiba hapoh shi snem.
U bah Tyrsa u la ong ruh ba naduh ba u dei uba smat bha ban thung dieng soh naduh dang samla bad haduh mynta da ki spah tynrai ki dieng soh ñiamtra u don ha kper jong u bad ynda la dei ka aïom ba ki la ih ka kper ka shu saw hur da ki soh.
Nalorkata u la ong ruh ba kawei pat ka kam kaba u kham sngew tynnad ban trei ka dei ban shna ïa ki tiar put tiar tem tynrai, ki sping wait, sping mohkhiew thaiñ kriah, khoh shang bad kiwei kiwei bad u ju leit buh ha man la ki dukan ha Nongstoiñ.
U la ong ruh ba ka jingpynïoh surok jong u bah Methodius Dkhar ka la long shisha ka jingmyntoi kaba khraw ïa ki nong shong shnong khamtam ïa ki nongrep namar baroh shi katta ïa ki mar rep ki ju kit da u briew haduh Risiang na ka bynta ban pynpoi sha Nongstoiñ, hynrei ynda la dep ïa katei ka surok ki nongrep kim don kam shuh ban kit haduh Risiang.
U la ong ruh ba na ka liang ki paitbah nongshong shnong ki la ai khublei kyrpang ïa u MLA uba la trei shitom na ka bynta ban pynsuk ïa ki paitbah ha ka leit ka wan ka kit ka bah bad kiwei kiwei ki jingdonkam.
