Shillong, Naitung 19 : U Symbud Myntri Rangbah ka Jylla Bah Prestone Tynsong u la ong ba ka jingshna ïa ka jingkieng sharum ka jingkieng dam Umiam ka la ïaid shaid shaid mynta bad ba ki khmih lynti ba la kumno kumno yn sa lah ban pyndep noh ha kine ki khyndiat bnai ban wan.
“Nga ngeit ba phi la ïohi ïa ka kam, namar na ka liang ki engineer ruh ki la kyntiew shuh shuh ïa ka jingkynjang jong ka jingkieng kaba dang ïaid mynta ha ka jingshna,” ong u Symbud Myntri Rangbah haba kren bad ki lad pathai khubor.
Shwa kane, haba jubab halor ka jingsyier jong ki paidbah halor katei ka jingkieng thymmai khamtam haba pyllait um na ka jingkieng rim, na ka liang u Bah Prestone ula ong ba shwa ba kin leh ïa kane ka projek ki la dep ban bishar bniah bha.
Ha kajuh ka por pat haba kren halor ka Mawlai Bypass kaba leit sha Umroi u Bah Prestone u la ïathuh ba kane ka kam ruh ka la ïaid shaid shaid ha kaba ka jingshna ïa ka jingkieng ka la jan dep. “Kumba 90 persen ka jingshna ïa ka jingkieng ka la dep,” u la ïathuh.
U ong ruh ba la kumno kumno hapoh u Nohprah ki khmih lynti ba yn sa lah ban pyndep noh. “Lada jia ba ngim pat lah ban pyndep ha u Nohprah hynrei la kumno kumno ha shwa u Lber jong u snem ban wan ngin pyrshang ban pyndep noh bad plie ruh ïa ka surok thymmai,” u la ong.
