Shillong, Jymmang, 12: Ka ophis jong ka Deputy Commissioner, East Khasi Hills District ha ka Lah Sngi U Blei ka la pynlong da ka Bike Rally ban ai burom ïa ki shipai bad ban pynpaw ïa ka jingdonlang bad ki shipai kiba ïada hakhmat eh ïa u pud u sam jong ka ri.
Kane ka sienjam ba la lamkhmat da ka Deputy Commissioner Kong R.M. Kurbah, ka long ban pynpaw ïa ka jingburom ïa ka jinglen lade bad ai ka jingshakri ba la aiti lut da ki shipai ka ri.
Ïa ka jingïaid rally la kaweh lama na Golflink da u Additional Deputy Commissioner Bah Shanborlang Warjri bad la pynkut pat ha phyllaw jong ka State Central Library.
Haba ai jingkren ha ka jingïalang balyngkot ka Kong Kurbah ka la pynpaw ba kane ka rally ka la long ban ai jingkyrshan ïa ki shipai kiba don bynta ban ïakhun pyrshah ïa ka ri Pakistan. Ka la pynpaw ruh ba ka jingjia ba dang shen ha Pahalgam ka la pynlong kum ka jingpynkynmaw ïa ka jingshlur bad ka jingaiti lut da ki bor shipai, bad bynrap ruh ba ka jingshngaiñ bad ka shongsuk shongshngaiñ jong ki paidbah ka dei na ka jinglen lade jong ki shipai.
“Ka ri ka ïatylli lang ban sngewnguh. Ka dei lyngba ka jingbym ïoh thiah jong ki, ba ngin ïoh thiah suk ma ngi,” ka la ong.
Da kaba pynpaw ïa ka jingai jingkyrshan ba khlem pud jong ka Sorkar, ka la ong ba ki shipai, kiba don ha ki jaka bapher bapher kim long marwei. “Ma ngi, ki paidbah ka ri India, ngi don lang bad ki ngin ieng tylli lang kawei,” ka la bynrap.
Ka Kong Kurbah ka la pynkut ïa ka jingkren da kaba pynpaw ïa ka jingkyrmen kaba bha bad ka jingshaniah ban jop haduh kaba kut jong ki bor shipai ka ri.
