Ïaid rally ki paidbah ka Wapung ki bym pat ioh ïa ka bai jaka na ka NHAI

Khliehriat naitung 29: Ki paidbah nongshongshnong jong ka Wapungskur bad Wapung Shnong, kaba hapoh ka jinglam khmat ka President jong ka Mahila Congress East Jaiñtia Hills District, ka kong Jhanika Siangshai, mynta ka sngi ki la ïa mih paidbah bad ïaid da ka rally na Wapung shnong haduh Mookhep ban pynpaw ïa ka jingsngew pyrshah ïa ka jingleh ka ophis u Deputy Commissioner ka East Jaiñtia Hills District ha kaba ïadei bad ka jingsiew ïa ka bai lutksan ne ka bai jaka sha kito ki trai jaka kiba la ai jaka ban pynheh ïa ka surok national highway.

Ka kong Jhanika Siangshai, ka la kynthoh jur ba ka jingai bai jaka ka la long kaba leh arsap bad ka bym ïaid beit bad ong ruh ba kane ka jingïaid rally kam dei jong ka party hynrei ka dei na ka bynta ki paidbah kiba khlem pat ioh ïa ka bai jaka, namar ha kane ka rally ki la don bun ruh kiba la wan ki bym dei na ka party congress, namar kane ka dei ka mat jong baroh kiba dawa bai jaka kiba na ka shnong Wapungskur bad wapung Shnong, kumjuh ruh ka la ai khublei ïa kiba la ïa wan ban ïa snoh kti lang ha kane ka jingïaid paidbah ban dawa ïa la ka jong ka hok.

U President jong ka Congress Wapungskur Unit, u bah Khmihbha Phawa, u la ïathuh bad pynshai ba ka jingiaid rally ka dei na ka bynta ki paidbah ki bym pat ioh ïa ka bai jaka kata naduh kito ki snem ba la leit ba ka National Highway Authority of India ka la shim bad pyndonkam ïa ki jaka jong ki briew “Ngi pynrem jur ïa ka ophis u Deputy Commissioner ha kaba ïadei bad kane ka kam ha kaba kane ka dei ka jingleh shiliang khmat ka ophis u Deputy Commissioner, namar kumba ngi tip ki la don kiba la dep ïoh ïa ka bai jaka, katba kiba bun pat kim pat ïoh ïa ka bai jaka, kumta kane ka jingïaid paidbah ka long kum ka jingpyrshah ïa ka jingleh shiliang khmat ka ophis u DC bad na ka liang ka party kan nym shong kli kti lada ka ophis u DC kam pat shim khia ïa kane ka kam” u la ïathuh ruh ba ki trai jaka ki la dep ban pynbiang ïa ki kot ba donkam bad ki la dep buh ha ophis u Deputy Commissioner bad ha ka jingbud dien la lap ba kam poi shano shano ruh bad ka kam ka dang sahteng haduh mynta.