Ïaid rally ki kynhun sengbhalang bapher bapher ha Jowai, pynrem jur ïa ki pulit Assam

Jowai, Naiwieng 26 : Ki kynhun sengbhalang kiba kynthup ïa ka JYF, HWW&DO, HANM, NHP, JSM, MPUF bad ki kiwei de mynta ka sngi 25 tarik kila pynlong ïa ka jingïaid rally naduh ka por 1 baje nohphai sngi na Lad Kiang Nangbah haduh Ïawmusiang bad pynlong ïa ka jingïalang ha stad Ummulong hajan ka Jowai Police Station.
Ki nongkren ha kane ka sngi kila kynthoh jur ïa ka sorkar jylla halor ka jingbym biang ka rukom treikam jong ka sorkar tad haduh ba la wanrah ïa ka jingduh noh ki 5 ngut ki mynsiem briew ha ka jingjia shah siat ïap ki paidbah Khas Pnar ha ka 22 tarik ha ka shnong Mukroh West Jaiñtia Hills District.
U President ka MPUF u Dapoiwan Laloo ula ong bunsien kum ki kynhun sengbhalang kila shah kdew kti ha kiba bun ki liang khamtam ha kum kine ki por jingïakhih, hynrei kum ki kynhun sengbhalang ki donkam ban mih shakhmat da ka lynti kaba jai jai na ka bynta dawa ïa ka hok haduh ban da ïoh ïa ka jingjop.
U samla K. Niangbri na ka NHP ha ka jingkren ula kynthoh jur ïa ka jingshah pynïap dusmon ki pulit Assam ïa ki briew ba lui lui kiba dei ki para doh para snam jong ka jaitbynriew, halor kane ula pynsngew kum ki kynhun sengbhalang kim hun satia ïa kane ka jingleh dusmon ki pulit Assam bad ki Forest Guard jong ka.
Ha kane ka jingïalang la pynrem jur ïa kane ka jingshah siat pathar jong ki Khasi Pnar ha Mukroh, da kaba pynsngew ba kine ki wan jia na ka daw ka jingtlod bor palat jong ka sorkar Meghalaya namar wat ïa ki pulit la jong kim lah satia ban phah leit ïada ïa ki paidbah ha ki jaka khappud, la kynthoh ruh ba kane ka sorkar ba mynta kaba la shah synshar hapoh ka sorkar Assam.