Ïaid paidbah ka Conference of Religious India ha Nongpoh ba shah ban beiñ ki khristan ha Manipur bad kiwei ki jaka
Nongpoh, Jylliew 10: Namar ka jinglong jingman haka jylla Manipur ha kaba bun naki paid riew ngeit khristan kila shah ban ban beiñ, ka jingshah thang bad shah pynjot pynpra jong ki iing mane khristan, ki skul naka huri hura bad ka jingïakynad jaitbynriew hapdeng ki Meitei bad ki Kuki, ka Conference of Religious India, Ri-Bhoi Zone mynta ka sngi kala pynlong da ka jingïalang lyngkot hakhmat ka Nongpoh Town Shopping Complex bad pynbud saka jingïaid paidbah ha surok bah haka thaiñ Nongpoh kum ka dak ka jingïatylli bad ki paid riew ngeit khristan haka jylla Manipur bad kiwei kiwei ki jaka jong ka Ri India.
Ha katei ka jingïalang bad ïaid paidbah jong ka CRI ha Nongpoh, la wan ban shim bynta naduh ki nongïalam ñiam na ka thaiñ Shatei Lam Mihngi, ba kynthup ïa u Br. Varghese SG, Sr. Escociana Vaz MSMHC, NE Regional CRI Secretary, Sr. Prema Chowallur SCC, Convener of North East FORUM of Religious for Justice and Peace, Sr. Teresa Kamasuam FMA, CRI Shillong President Fr. Laurence Kharluni, Shillong Archdiocese, Br. Sunil Britto CFC, CRI Ri-bhoi President, Sr. Melita Syiem MSMHC ki samla jong ka St. Stephen Hostel Girls, Bah Opel Lyngdoh Rangbah Shnong ka Nongpoh bad kiwei kiwei.
Ha katei ka jingïaid paidbah ban wanrah ïaka jingsuk ha Manipur naka liang kitei ki nongïashimbynta kila rah ruh da ki placard ban pynrem jur ïaka jingshah ban beiñ jong ki khristan ha katei ka jylla bad ban dawa naka sorkar jylla jong ka Manipur bad kumjuh ruh ka sorkar pdeng ban ai ka jingïada ïaki paid khristan ha katei ka jylla khamtam ban pynkut noh ïaka jingïakynad khnang ba ki paidbah kin ioh biang ïaka jingsuk.
Ki nongïalam jong ka CRI haba kren ha katei ka sngi kila pynpaw ka jingsngewkhia bad pynrem jur ïaka jingshah lehbeiñ jong ki paidbah khristan kiba la noh synñiang shibun sha ka imlang ka sahlang ha katei ka jaka naduh ki jaka pule, ki ïiing mane ha kaba kiwei ki riew ngeit ki kheiñ beit ba ki khristan ki dei ki nongpynkylla ñiam, kaba la pynlong ïaki ban thombor bad thang dusmon wat ïaki jaka mane Blei bad ki skul Mission ha kaba bun naki paidbah kila duh noh ïaka jingim ha katei ka jingïakynad.
Kila ong ruh ba halor ka jingshah thombor jong ki khristan, bun naki paidbah kila kylla phetwir bad sah haki ïing sher dara bad kaba sngewsih ka long ba wat ka sorkar Manipur kam shym la peit bad khmih ban ïarap bad ban ai ka jingïada kaba kyrpang kaba ki kynhun thombor ki nang ioh mynsiem ban pynkulmar, ha kaba kum ka kynhun ñiam ki buh ruh ka jingduwai ba katei ka jingïakynad kan kut noh bad kyrpad shaka sorkar Manipur bad ka sorkar Pdeng ban leh eiei ban pynkut noh ïaka jingïakynad bad ban ai ka jingïada ïa kiba shah ktah.