Nongpoh, Naitung 21: Ka jingbym lah shah shuh halor ka jingktah ki paidbah na ka jinglip bording kaba la ju jia na ka por sha ka por bad da ki phew snem ki paidbah ki mat ïa kane ka juh ka jingeh, ka HYC Western Ri Bhoi mynta ka sngi ka la pynlong syndon da ka jingïaid paidbah ban pynpaw ïa ka jingsngewkhia kaba jur halor kane ka jingshah ktah ki paidbah.
Ïa kane ka jingïaid paidbah la pynlong ha Patharkhmah ha kaba la shim bynta naduh ki paidbah nongshong shnong, ki nongïalam shnong, ki khynnah skul bad ki riew rangbah, ha kaba la rah ruh ai ki placard bad ki banner ryngkat kita ki jingthoh ba ki pynpaw ïaka jingsngewkhia ba ki shah ktah na ka jinglip bording kaba man ka por.
Ki khynnah skul bad ki paidbah ha ka jingïaid paidbah ki la pynsawa ruh ïa ka sur kaba jam ban pynrem ïa ka tnad MeECL kaba ym lah ban pynbiang thikna ïa ka bording bad kane ka la ktah shisha ha baroh ki liang jong ka jingim khamtam ha ki jaka ai jingsumar, ki khynnah skul bad ki tnad sorkar kiba hap ban pyndonkam da ka bording ilektrik.
Haba ai jingkren ruh ha kane ka sngi, naduh u Sordar Shnong ka Patharkhmah, u Bah Petalman Thangkhiew, u President ka HYC Western Ri Bhoi, u Bah R.C Thangkhiew lem bad kiwei ki nongïalam ki la pynpaw ïa ka jingsngewkhia ba ki paidbah ki shah ktah na ka jinglip bording bad ka jingbym biang ba pynpoi ïa ka bording ilektrik haduh ba ki paidbah ki la shah ktah ha baroh ki liang jong ka jingim.
Shuh shuh, ka sur kaba la sawa na kine ki nongïalam bad na ki paidbah ka dei ka jingdawa ba dei ban pynbiang mardor ïa ka bording ilektrik bad ha kajuh ka por ki dawa ruh ban buh ïa ka 33 KV Power Station, namar dei tang kane ka lad ka lynti kaba lah ban pynbiang ïa ka bording ilektrik katkum ka jingdonkam u paidbah ha katei ka thaiñ kaba ki la mad ïa ka jinglip bording kaba ïaid da ki phew snem mynta, ki la bynrap.
