Guwahati, Jymmang 03: Kum shi bynta ban pynkhlaiñ ïa ka jingpahara ha ka than khappud bad kumjuh ruh ban ïada ïa ki jingshna ïa ki lynti rel, ka Railway Protection Force (RPF) jong ka Northeast Frontier Railway (NFR), ha ka jingïatrei lang kaba jan bha bad ka Government Railway Police (GRP) bad ki shipai Border Security Force (BSF), kila sdang ban pynlong ïa ka jingïaid pahara lang ha ki khappud jong ka India-Bangladesh.
Kane ka jingïatrei lang, la sdang mynta ka sngi da ka jingthmu ban pynkhlaiñ ïa ka jingpeitngor ha ki shilynter jong ki lynti rel kiba don ha ka thaiñ khappud kiba don ha ka thaiñ Northeast India. Kane ka kynhun (patrolling teams) la bthah ba kin peit bniah bha ha ki bynta kiba lah ban mih ka jingpynthut bad ka jingïoh rung suk lyngba ki jaka ba shna lynti rel.
Katkum ka tyllong khubor na ka NFR, kane ka jingïaid pahara ne (patrolling) ha kylleng ki division kiba don hapoh ka zone, da kaba pyrkhat kyrpang ïa ki bynta kiba ïajan bad u pud u sam jong ka Bangladesh. Ki agency bapher bapher ki dang bishar bniah ruh ïa ka jinglong ba la pynkhreh ha ka rukom ban pynneh ïa ki lynti rel.
Kane ka jingkylla ka long hadien ka jingsngewkhia kaba la nang kiew halor ki jingrung jingmih beaiñ (cross-border) hadien ba ka Sheikh Hasina kam don shuh ha ka bor synshar ha Bangladesh myn shem snem bad ki don shibun ngut kiba la shah kem na steshon rel kiba don hajan khappud namar ka jingwan rung beaiñ sha kane ka jylla. Kane ka thaiñ la tip ruh ba kadei ka lynti ïaid jong ki Rohingya hapdeng ka India bad ka Bangladesh.
Kane ka jingïaid patrolling lang kadei ka sienjam kaba shim khia ban ïada ïa ki jingïadei bad ka leit ka wan ne transportation ha ka thaiñ khappud, la ong ki heh sorkar.
