Khliehriat Iaïong 16: U Vijay Kumar lem bad uwei u dkhot, u ba kyrteng u Lal Mohan, kiba dei ki nongtrei mon sngewbha kiba na ka jylla Bihar ki la iaid da ka kjat bad buh thong ban iaid sha kylleng ka ri India bad mynta ka taiew ki la leit poi shaduh Tripura, Agartala bad ki bynta ba shatei lam mih ngi ha kaba ki la pynlong ruh ïa ka jingshah jingit kaba ar sngi ha ka 12 bad 13 tarik mynta u bnai, kane ka jingiaid kjat ka long ban pynsngew sha ka sorkar ïa ki phra tylli ki mat jingdawa jong ki.
Hynnin ka sngi, ka 15 tarik kine ki nongtrei mon sngewbha ki la wanpoi bad iaid ha ka surok bah Byndihati, East Jaiñtia Hills District da kaba ki la rah ïa ka lama ka ri India, ha ryngkat bad ki, la don uwei pat uba la iasynran lang ïa ki da ka kali khnang ban pynthikna bad ka jingiaid jong ki kan long kaba shngaiñ bad ki ju thiah ha kata ka kali haba lap ka miet.
Ha kaba ïakren bad ka nongthoh khubor ha Byndihati, u Vijay Kumar bad u Lal Mohan ki la iathuh ba ki la pynkong ïa kane ka jing iaid kjat jing ki ban pynpaw ne pyn sngew sha ka sorkar India halor ki phra tylli ki mat jingdawa kiba ki la buh hakhmat jong ka sorkar India.
Ki phra tylli ki mat jingdawa ba ki la dawa ki long ban pynkylla noh ïa ka rukom ha ka synshar khardar ha ka ri, ban pynkylla noh na ka Panchayat sha ka Parliament bad 80% dei ban ïa donbynta lang da ki samla, kaba lai ka jing dawa ka long ba ka sorkar ka dei ban siew allawance sha ki samla ba la nang la stad ki bymioh kam ioh jam, ban pynrung noh ïa ka kyrta trei kam na ka bynta ki politician ruh kumba leh ïa ki nongtrei sorkar, ban pynduh noh ïa ka double pension ïa ki dkhot jong ki iïng Dorbar Thawaiñ bad ki nong thaw aiñ (Politician), ki dawa ruh ba ïa ka Election dei ban pyniaid da ka jingpynlut na ka sorkar khnang ba kiba duk ruh kin ioh ban iashimbynta lang, na ka bynta ka jingmyntoi jongki paidbah, ïa ki Chief Minister bad u Prime Minister dei ban jied da ki paidbah ym satia da ki MLA bad ki MP bad ka jing dawa kaba phra ka long ba ka sorkar ka dei ban pynlong ïa ka ri India kaba lait na ki drok ban pyllaitluid ïa ki samla ka ri.
