Ïaid beit ki kam jingtohkit haba ïadei bad ka kam pynïap briew ïa u nongwan jngohkai ha Sohra: DGP

Shillong, Jylliew 16: Ka Director General of Police (DGP) ka jylla ka kong Idashisha Nongrang ha ka sngi Nyngkong ka la ong ba ka jingtohkit ha kaba ïadei bad ka kam pynïap briew kaba la jia ia u nongwan jngohkai na Indore u (L) Raja Raghuvanshi ka la long kaba ïaid beit bad kaba sted, bad ruh ki la don ki jingtohkit kiba la ai ki jinglam khmat bad ïa ka chargesheet yn sa lah ban pyndep ha ka por kumba la buh. Haba kren sha ki lad pathai khubor na ka liang jong ka DGP ka la ong ba baroh ki 5 ngut kiba dang shah tohkit mynta na ka liang jong ki pulit ruh ki la leh ïa ka kam na ka bynta ban ïoh ïa ki sakhi satar ha kaba ïadei bad kane ka jingjia. “Ngi la ïoh 8 sngi ban tohkit ïa ki bad kane ka kam ka la ïaid bha mynta. Ngi la leh ïa ka kam kaba bha palat ban pyndep ïa kane ka jingtohkit khnang ban ïoh ïa ki sakhi satar kiba biang bad ngi kyrmen ruh ban pyndep pura ïa kane ka jingtohkit ban pyndep ïa ka chargesheet ha ka por ba la buh”, ka la ong.
Haba kylli ïa ka por ba la leh ïa kane ka kam runar na ka liang ka Kong Nongrang ka la ong, “Ngam lah ban batai thikna bad baroh ki kam yn lah ban tip ha ka sngi baar.” Kane ka jingïalam ban tip shaphang kane ka kam runar kaba la leh la khmih lynti ba kan long hajan ka jaka ïeng kali kaba hajan Wei Sawdong Falls kaba ha Sohra ha kaba la lap ïa ka metïap jong u Raja.