Khliehriat Risaw 07 : Ka public hearing jong ka company Star Cement Lumshnong ba la pynlong mynta ka sngi ka 7 tarik u risaw 2024 ha shnong Lumshnong East Jaiñtia Hills District ka la ïaid beit haduh kaba kut ha kaba baroh kiba ai jingkren ha rynsan ki la ai ka jingkyrshan ïa ka company kaba don ka jingthmu ban khlong ïa u mawshun na kawei ka par kaba don ha Lumshnong, ka Daba Saitthad Limestoene Deposit kaba don ka jingheh kaba 25 hectare ha Wahlareng.
Katei ka par mawshun Daba Saitthad Limestoene Deposit ha Wahlareng, Lumshnong, ka dei ka jaka jong ka Balang Presbyterian Lumshnong.
Ha kane ka public hearing, ki la don khatsaw ngut kiba la ai jingkren ha rynsan bad u Santosh Pant, uba dei u Consultant jong ka project u la ai ki jingbatai ba bniah ha kaba iadei bad ka project ban khlong ïa u mawshun na katei ka par Daba Saitthad kaba don ha Wahlareng ha shnong Lumshnong.
Na ka liang u Doloi jong ka Elaka Narpuh, u Doloi Manbha Kyndoh u la ai ka jingkyrshan ïa ka Star Cement ha kane ka jingthmu ban khlong ïa u mawshun na katei ka par ka Daba Saitthad Limestone Deposit kaba don ha shnong Lumshnong.
Kumjuh ruh u Waheh Shong Lumshnong, u bah Monlang Ladong, u la ong ba kumba la dep ban iateh kular bad ka Environment u kyrpad bad kyntu ïa ka company Star Cement ba ka dei ruh ban da peit bha ba ym dei ban leh klumar ne leh thurmur haba pyntrei ha kane ka par maw shun hynrei dei ban da leh bha ha kata ka rukom ba ka jingkhlong mawshun kan nym ktah ïa ka mariang, u la ai ruh ka jingkitbok kitrwiang ba ki kam kin ïaid beit ha kane ka par mawshun ha Daba saitthad ha Lumshnong.
U Chairman jong ka Balang Presbyterian Lumshnong, u bah Grimlang Dkhar, u la ong ba na ka liang ka Balang ka ai ka jingkyrshan ïa ka Star Cement halor ka jingthmmu ban tih ïa u mawhsun bad u kyrpad ruh ïa ki bor ba dei peit ba kin pynkloi ban ai ïa ka clearance ban ban pyntrei ïa kane ka par mawshun.
U Bah B.G.Rymbai, uba na ka shnong Tongseng Narpuh u la ai ka jingkyrshan ïa ka star cement bad ong ruh ba lyngba ka compny ka shnong ka ioh bun ki jingmyntoi khamtam ha kino kino ki kam kiba iadei bad ka imlang ka sahlang ha shnong Tongseng, u kyrpad ïa ki bor kiba dei peit ba kin ai ïa ka claearance bad ruh ba kin ai ne buh ruh bad ki kyndon ba ka jingtih mawshun kam dei pat ban pynsniew ïa ka mariang lane ïa ki um ki wah bad u khmihlynti ba kane ka jingailad ban pyntrei ïa kane ka par kan long kaba iaid beit ïaid ryntih.
U Waheh Shnong Umsaiñ, u bah R.Suchiang u la iathuh ba hadien ba la ioh ïa ka shithih na ka company star cement, na ka liang jong u kum u Waheh Shnong u la khot da ka Dorbar Shnong bad hadien ba la ïa pyrkhat sani bha ka Doarbar shnong ka la shim ïa ka rai ban ai ka jingkyrshan ïa ka company Star Cement bad kum ka dak ka jingkyrshan ki nong shnong shnong jong ka shnong Umstaiñ kiba la wan sha kane ka public hearing ki la ieng bad ai ka jingkyrshan ïa ka company Star Cement.
U bah Lamshwa Kyndoh, u la ong ba u la dep pynsngew ha u Waheh Shnong ba ka Balang ka donkam ban shna ïingmane bad ki don ruh bun ki kam ba ka balang ka donkam ban leh bad ruh, kumta lyngba ka jingai wai ïa kane ka par mawshun sha ka company Star Cement kaba dei ka jaka jong ka Balang Presbyterian Lumshnong ka balang kan ioh ki lad ban leh bun ki kam kiba donkam hapoh ka Balang.
La plie ïa kane ka Public Hearing da u ADC East Jaiñtia Hills District, u bah G.Warjri bad la pyniaid pat da u Environmental Engineer ka tnat Meghalaya Pollution Control Board, u bah Y.F.Laloo, kiba la ai jingkren ki kynthup ruh u Secretary Shnong Lumshnong, u bah Embhahlang Lamare, U waheh shnong barim jong ka Umstaiñ, u bah Victor Suchiang, u bah Damekit Pynkhlong bad kiwei kiwei.
