Ïaid beit ka jingthep Vote, poi 71 % ha WKH bad 81% ha EWKH

Nongstoiñ, Rymphang 21: Ka jingthep vote sha ka Khasi Hills Autonomous District Council ha West Khasi Hills, ka la ïaid beit ïaid ryntih naduh ka por mynstep haduh da kut ka por thep vote.
Katkum u Bah V.Swer Additional District Magistrate u la ong ba ka jingthep vote naduh mynstep haduh ka por 4 baje janmiet kumba la dep buh por, ka la long kaba ïaid beit bad ryntih ha man la ki polling station kiba hap ha ki lai constituency jong ka West Khasi Hills District.
U la ong ba tad haduh ka por 7 baje janmiet la ïoh jingkheiñ antad ba na Mawshynrut Consituency, ka jingpoi ki nongthep vote ka long 72.52 percent, Rambrai Jyrngam Constituency ka long 77.08 percent bad Nongstoiñ Constituency ka long 65.75 percent.
U la ong ruh ba kane ka long tang ka jingkheiñ antad, namar ki bun ki polling station kiba don jngai na Nongstoiñ District Head Quarter, khamtam kito kiba don sha ki jaka khappud, ki ban sa poi haduh ka por shiteng miet, kumta ka jingkheiñ kan ym pat long kaba biang tad ynda la poi lut baroh.
Kumjuh ruh na ka liang u Bah Nongbri Additional Deputy Commissioner ka Eastern West Khasi Hills, u la ong ba tad haduh ka por 7 baje janmiet, ka jingpoi ki nongthep vote ha Mawthadraishan ka long haduh kumba 80 percent. Katba ha Mairang ka jingpoi ki nongthep vote ka long kumba 81 percent ei ei. Tangba kane ka dei kaba la shu kheiñ antad namar dang don bun ki polling station ki bym shym pat la lah satia ban poi namar ka jingjngai.
Ki khlieh nongsynshar jong ki ar District ki la kren shai ruh ba dei tad haduh ka sngi saitjaiñ 22 tarik, ba yn lah ban pynthikna ïa ka jingpoi ki nongthep vote ha ki San Constituency jong ki ar District.