Shillong, Rymphang 01 : Ka Congress kaba don ha ka Liang Pyrshah ha ka sngi Balang ka la kynnoh ïa u Myntri Rangbah ka Jylla, Conrad K Sangma ba u ïada ïa ki briew kiba donkti ha ki kam bamsap.
“Sngewsih, ba u (Myntri Rangbah) u la pyndonkam bakla ïa kane ka kabu ban shakri ïa ki paidbah ka jylla, pynban u la don bynta lang ha ka kam bamsap bad ki dkhot ka MDA,” ong ka media coordinator jong ka AICC, u Bobbeeta Sharma haba kren bad ki lad pathai khubor.
Shuh shuh ka la ong ruh ba katei ka la dei kaei kaei kaba sngewkhia bha da kaba ai tiket sha u engineer uba la don bynta ha ka jingkhyllem jong u dome jong ka Iing Dorbar Thawaiñ ka jylla. “Kane ka pyni ba ha ka jaka ban pynshitom ïa ki ba donkti ka sorkar MDA ka ai burom pynban ïa u. Kane ka pyni ba ki don bynta lang bad ki briew kiba donkti ha ka kam bamsap bad bad ka bamsap,” ka la ong.
Shuh shuh ka la buh jingkylli ruh halor ka jingleit pynïasoh NPP jong ka Dr. Ampareen Lyngdoh. Ka kynnoh ruh ba kane ka sorkar MDA ba ïalam da ka NPP ka ïada ïa ki briew kiba don dak bad kiba bamsap.
Nalorkata, katei ka heh Congress ka la kynnoh ruh ba kane ka sorkar ba ïalam da ka NPP ka la shim ïa ka jingïarap jong ka BJP ban ïoh ïa ka jingïada na ki kam bamsap.
“Ka BJP ka ïarap ban ai ka jingïada, kumta ka BJP bad NPP ki la don bynta lang ban ai ka jingïada na ki kam bamsap bad lute ïa ki paidbah ka jylla,” ka la ong.
Da kaba ong ba ki paidbah ka Meghalaya kin ym pdiang ïa ka BJP namar kadei ka party nongwei, ka Sharma ka ong ruh ba ka NPP kadei ban kynmaw ba haba ki leit sha ka BJP ban ïoh ïa ka jingïada na ki kam bamsap, ki la don bynta lang ruh bad ka BJP kaba dei ka party nongwei.
Na ka liang u media coordinator ka AICC, u Mathew Antony pat u la ong ba ka Congress kadei tang ma ka, ka party na ka bynta ki paidbah ka Meghalaya.
“Khlem pep mar ïa wan ha ka bor, ngi don ka jingkitkhlieh ïa ki paidbah ka jylla ba ngin phah tohkit lut ïa baroh ki kam suba bamsap bad lada lap ïano ïano ba donkti kin ngat ha ki kyndon jong ka aiñ,” u la ong.
