Shillong, Naiwieng 20 : Ka Bharatiya Janata Party (BJP) Meghalaya ka la pynkhreh ba la kumno kumno ha u Nohprah kin ïoh ban pynbna noh ïa u kyrtong Myntri Rangbah ban ïalam ïa ka jylla ka BJP ka ïoh ïa ka jingshaniah ban ïalam ïa ka sorkar jylla.
“La kumno kumno ha u Nohprah ngin ïoh ban pynbna noh ïa u kyrtong Myntri Rangbah,” ong u President ka BJP Meghalaya, Bah Ernest Mawrie.
Katkum ka jingong jong u, ka party mynta ka dang bishar ha baroh ki liang khamtam eh haba ki don katto katne ki MLA na kiwei pat ki party kiban wan ban pynïasoh bad ïakhun noh na ka party ha u 2023.
Dang shen ki nongïalam ka BJP ki la kam ba ki don haduh kumba lai ngut ei ei ki MLA na kiwei ki party kiba la pyntikna ban wan ïakhun noh na ka party ha ka elekshon ban wan.
Lah ruh ban kdew hangne ba ka Meghalaya ka don tang arngut ki MLA kiba jop na tiket BJP ha u 2018 ba kynthup ïa u Bah Sanbor Shullai na Shillong South ba dei ruh u Myntri ka tnad Arts and Culture bad u Bah AL Hek uba jop na Pynthorumkhrah constituency.
Dang shen na ka liang u Bah Hek u la dep ruh ban pynpaw ba u long uba kloi ban ïalam kum u kyrtong Myntri Rangbah ha u 2023 lada jia ba ki bor bahalor ka party ki ailad ïa u.
