Ïa suhbuit u nongialam ka HNLC bad u nongleh bei-jot, ban pynthei bom ha Dhar Construction

Shillong, Nohprah 21: Uwei u nongialam ka Hynniewtrep National Liberation Council (HNLC) bad u wei u briew shimet, kidei kiba la shah thwet bha ha ki pulit ha kaba iadei bad ka POCSO case bad kidei kiba la ithuh kum ki nongsuhbuit kiba donkti ban pynbthei bom (IED) ha phyllaw jong ka Dhar Construction Company ha ka shnong Shymplong, East Jaintia Hills.
Kane ka jingbthei bom kadei ha ka miet 15 tarik mynta u bnai Nohprah, kaba la wanrah ia ka jingkulor ia ka trok kit um hynrei kam shym la don kiba mynsaw.
Hadien katei ka jingjia, ki pulit kila kem ia u Richard Suchen (31) bad u Pynshaitbor Syih (45), kine baroh kidei na ka shnong Shymplong.
“Katkum ka jingtohkit la lap ba u Smiki Tongper na ka shnong Shymplong bad u wei u dkhot ka HNLC u Issei Sungoh ba na Khliehriat kila ia sylla ban pynbthei bom ha ka jingiatrei lang ryngkat bad kitei ki ar ngut kiba la shah,” ong u Vikash Kumar u Superintendent of Police ka East Jantia Hills.
Shuh shuh une u heh pulit u  la ong, “Katba u Smiki Tongper u dei uba la shah thwet ha kiwei ki case bala register hapoh ki kyndon ka POCSO Act, u Issei Sungoh u dei uba shah thwet halor ka jingpynbthei bomb IED ha Police Reserve ha Khliehriat lem bad kiwei ki kam beain”.
Na ka liang ki pulit kila pynlong ruh ia ka jingkhynra hapoh ka ïing sah jong u Tongper bad kumjuh ha phyllaw bad kila ioh kurup bun ki tiar shna bomb ba kynthup ia 3 roll ki safety fuse bad 2 tylli ki safety fuse ba rit, 3 tylli ki detonator, u bakhor, 82 tylli ki splinter, kawei ka suloi shna hi bad 2 tylli ki handset bad 5 tylli ki fuse.
U Kumar u la kyrpad ia ka jingiarap na ki paidbah da kaba u la kular ban buhrieh ia ka kyrteng bad ka jaka sah bad kumjuh ruh ka khusnam ia kiba ai ka jingtip ba bniah.
“Lada don mano mano kiba don jingtip shaphang jong kine ki runar kiba donkti ha ki kam beain, la kyrpad ba ki jingtip mardor sha ki Police Station.Ia ka jingithuh jong ki un buh rieh bad kumjuh ruh ka khusanam un sa ai sha ki.”
Ia kane ka case la register ha Lumshnong Police Station hapoh ki kyndon ?109(1),?113(1),?113(2),?113(3),?326(f) and?327(2) jong ka Bharatiya Nyaya Sanhita, bad ka kyndon ba ?3 jong ka Explosive Substances Act.
Ka HNLC kala kam ia ka jingbah khlieh halor katei ka jingthombor, da kaba kynnoh ban pynjot ne pynduh ia ki jingdon jingem kia dei jong u Symbud Myntri Rangbah u Bah Sniawbhalang?Dhar hadien ba u la kyntait ban siew pisa.
Na ka liang u Conrad K Sangma u la maham da kaba tyngeh ba ka sorkar kan ym shu sngap mynthi hynrei kan leh da kaba tyngeh ia kum kine ki kam be-ain bad ka ain kila don ia ki sakhi kiba biang ban leh da kaba tyngeh.