Khliehriat Risaw 03: Ka National Service Scheme (NSS) jong ka Jaiñtia Eastern College, Khliehriat ka la ïa shimbynta lang ha kaba rakhe ïa ka SWACHHTA HI SEVA CAMPAIGN, 2024 kaba la sdang naduh ka 19 tarik u bnai nailur 2024 bad pynkut ha ka 2 tarik u bnai risaw, kane ka campaign ne ka jingialap paidbah ka dei kaba la wan na ka sorkar pdeng kaba la bthah ïa ki nongshongshnong jong ka ri India ba kin rakhe kyrpang da kaba mih sha khmat ban pynkhuid pyn suba bad pynitynnat ïa ki shnong ki thaw bad kiwei pat ki jaka khamtam eh ki jaka paidbah ba kin long kiba khuid ba suba.
U kyrwoh khubor ba la phah da u Programme Officer NSS Unit Jaiñtia Eastern College Khliehriat, u bah Jamphrang Lyngdoh u la iathuh ba hapoh jong kitei ki sngi, ki lai tylli ki NSS Unit jong ka college, lyngba ki volunteer kynthei bad shynrang kiba dei ki samla pule jong katei ka college, ki programme officer jong ki lai tylli ki unit, ki nonghikai lem bad u Dr.P.Nongtdu, uba dei u Principal jong ka college ki la mih shakhmat da ka jingshitrhem ban pynkhuid pynsuba ïa kiba bun ki jaka hapoh ka sor bah Khliehriat kiba kynthup ïa ki rud ki kiar jong ka Jaiñtia Eastern College, ki jaka pynieng kali (parking) kaba don hapoh Khliehriat West, ki lynti ki syngkien kiba don hapoh ki dong ki shat bapher bapher ha Khliehriat.
La ong ruh ba myn ha ka 2 tarik u risaw kaba dei ruh ka sngikha jong u Kpa ka ri India, u Mahatma Gandhi, ki lai unit ki la pynkhuid pynsuba sa ïa ka phyllaw bad ki jaka jong ka ophis u Deputy Commissioner, East Jaiñtia Hills. Kumjuh ruh ki unit ki la pynkhuid itynnad ruh ïa u Mot sah nam jong u Kiang Nangbah, u ba dei u khlawait nongialeh laitluid ka ri jongngi. Shuhshuh kine ki unit jong ka college ki la pynkhuid biang sa shisien ïa ki lynti ki syngkien ïa kiba ki la dep pynkhuid myn ha ka 19 tarik u bnai ba la dep.
Ha kaba pynkut ïa ka jingrakhe, ki lai tylli ki Unit NSS jong ka college ki ai khublei sngewnguh ïa ki volunteer, ki nonghikai kiba la ïa wan shim byntalang naduh ka ba sdang bad kyrpang eh ïa u Dr.P.Nongtdu, Principal u ba la wan shimbynta, ym tang ba u long nongaibuit nong ai bor hynrei uba da lade hi uba la long ka nongmuna ne ka nuksa ïa kiwei da kaba u la ïa shimbynta shitrhem ha kane ka jingrakhe naduh kaba sdang haduh kaba kut jong ka campaign, pynkut u kyrwoh na u Programme Officer NSS Jaiñtia Eastern College Khliehriat, bah Jamphrang Lyngdoh.
